თეთრი სახლის პრესმდივანმა, ქეროლაინ ლევიტმა სამშაბათს გამართულ ბრიფინგზე განაცხადა, რომ რუსეთის პრეზიდენტი ვლადიმირ პუტინი უკრაინის პრეზიდენტ ვოლოდიმირ ზელენსკისთან ორმხრივ შეხვედრას დათანხმდა და ახლა ტრამპი უკრაინისა და რუსეთის ლიდერების ორმხრივ შეხვედრას ელოდება,
მისივე თქმით, ტრამპის ადმინისტრაცია მუშაობს ამ შეხვედრის ჩასატარებლად.
„პრეზიდენტი [ტრამპი] ყოველთვის ამბობდა, რომ ამ ომში არის საკითხები, რომლებზეც არსებობს აზრთა სხვადასხვაობა, რომლებიც ამ ორ ქვეყანას შორის განხილვასა და მოგვარებას საჭიროებს. ამიტომ, მას სურს, რომ ამ ორმა ქვეყანამ პირდაპირი დიპლომატიური მოლაპარაკებები დაიწყოს,“ - თქვა ლევიტმა.
დონალდ ტრამპთან საუბრისას, როგორც უკრაინის, ასევე რუსეთის ლიდერებმა „გამოთქვეს მზადყოფნა, მოლაპარაკების მაგიდასთან დასხდნენ, ამიტომ ჩვენი ეროვნული უსაფრთხოების გუნდი ორივე ქვეყანას ამაში დაეხმარება“, - განაცხადა ლევიტმა.
კითხვაზე, დაადასტურა თუ არა პუტინმა ტრამპთან საუბრისას ზელენსკისთან ორმხრივი შეხვედრისთვის მზადყოფნა, თეთრი სახლის პრესმდივანმა ეს რამდენჯერმე დაადასტურა.
„ეს იდეა გუშინ პრეზიდენტსა და პუტინს, ზელენსკის და ევროპელ ლიდერებს შორის გამართული მოლაპარაკებების დროს დაიბადა.
და როგორც ხედავთ, ყველა ევროპელი ლიდერი, ვინც თეთრი სახლი დატოვა, მათ შორის ნატო-ს გენერალური მდივანი, დაეთანხმა, რომ ეს შესანიშნავი პირველი ნაბიჯია“, - თქვა ლევიტმა.
