“დიდი შვიდეულის” ქვეყნების საგარეო საქმეთა მინისტრებმა მხარდაჭერა გამოუცხადეს ისრაელსა და ირანს შორის ცეცხლის შეწყვეტის შესახებ შეთანხმებას და მოუწოდეს ბირთვული შეთანხმების შესახებ მოლაპარაკებების განახლებისკენ.
ამის შესახებ G7-ის ერთობლივ განცხადებაშია ნათქვამი.
„დიდი შვიდეულის“ ქვეყნების საგარეო საქმეთა მინისტრებმა კიდევ ერთხელ დაადასტურეს მხარდაჭერა ისრაელსა და ირანს შორის აშშ-ის პრეზიდენტის, დონალდ ტრამპის მიერ გამოცხადებული ცეცხლის შეწყვეტის შესახებ და მოუწოდეს ყველა მხარეს, თავი შეიკავონ ისეთი ქმედებებისგან, რამაც შეიძლება კიდევ უფრო გააუარესოს სიტუაცია რეგიონში.
განცხადებაში მინისტრებმა კიდევ ერთხელ აღნიშნეს, რომ ირანს „არასდროს ექნება ბირთვული იარაღი“ და მოუწოდეს მას „თავი შეიკავოს ურანის გამდიდრების გაუმართლებელი საქმიანობის განახლებისგან“.
„ჩვენ მოვუწოდებთ მოლაპარაკებების განახლებისკენ, რამაც უნდა გამოიწვიოს ყოვლისმომცველი, სანდო და მდგრადი შეთანხმება, რომელიც გადაჭრის ირანის ბირთვული პროგრამის საკითხს“, - აღნიშნულია განცხადებაში.