უკრაინის პრეზიდენტი ვოლოდიმირ ზელენსკი აცხადებს, რომ გერმანიამ ევროკავშირის სანქციების მე-18 პაკეტის დამტკიცების მიზნით უნგრეთზე გავლენა მოახდინოს.
ამის შესახებ ზელენსკიმ კიევში გერმანიის საგარეო საქმეთა მინისტრ იოჰან ვადეფულთან შეხვედრისას განაცხადა.
„მადლიერები ვართ რუსული აგრესიის წინააღმდეგ სანქციების მე-18 პაკეტის მხარდაჭერისთვის. ვიცი, რომ ევროპელი ლიდერები ამ პაკეტთან ძალიან ახლოს არიან. ვიცი, რომ ოფიციალურ ბუდაპეშტთან გარკვეული გაუგებრობებია და აქ ჩვენი მხრივ, გვსურს ვთქვათ, რომ უნგრეთთან დიალოგთან დაკავშირებით გერმანიას, როგორც ევროპაში ძლიერ ლიდერს მივმართავთ“, - აღნიშნა ზელენსკიმ.
ზელენსკის სურს, რომ გერმანიამ გავლენა მოახდინოს უნგრეთზე.
„ვფიქრობ, მთელი ევროპის ინტერესებშია, რომ რუსული აგრესიის საწინააღმდეგო პაკეტებმა იმუშაოს, რათა რუსეთმა იგრძნოს ამ ომის მაღალი ფასი და სწორედ სანქციების გამო დაზარალდება მათი ეკონომიკა. რა თქმა უნდა, ეს შეამცირებს რუსეთისთვის ომის მანქანისთვის გამოყოფილი თანხების რაოდენობას“, - აღნიშნა ზელენსკიმ.
ამავდროულად, როგორც ზელენსკიმ აღნიშნა, უკრაინა, თავის მხრივ, ძალიან დიპლომატიურად და კონსტრუქციულად იქცევა და არ რეაგირებს უნგრეთის შესაბამის ნაბიჯებზე.
კერძოდ, უკრაინას სურს, რომ დარჩეს პარტნიორობისა და მეგობრობის რეჟიმში.
„რა თქმა უნდა, უკრაინას აქვს პასუხი. მაგრამ, მიუხედავად ამისა, ჩვენ პარტნიორები ვართ და გვყავს ერთი მტერი. ეს რუსეთია“, - დასძინა ზელენსკიმ.
თავის მხრივ, ვადეფულმა აღნიშნა, რომ გერმანია მომავალშიც უკრაინის მხარდამჭერი იქნება.
„რაც შეეხება რუსეთის მიერ საერთაშორისო სამართლის საწინააღმდეგო დამპყრობლურ ომს, ჩვენ ვიცით, რომ თქვენ იცავთ არა მხოლოდ უკრაინის სუვერენიტეტსა და თავისუფლებას, არამედ ევროპის სუვერენიტეტსა და თავისუფლებასაც. და ამგვარად - გერმანიასაც. და ამიტომ, ჩვენ მხარს გიჭერთ. რა გამოწვევების წინაშეც არ უნდა ვიდგეთ. როგორც თქვენ, ასევე ჩვენ, რა სიტუაციაც არ უნდა იყოს, ამ კითხვაზე სწორ პასუხებს ვიპოვით“, - აღნიშნა უეიდფულმა.
გერმანიის საგარეო საქმეთა მინისტრმა დასძინა, რომ ზელენსკი აბსოლუტურად მართალია, როდესაც აღნიშნავს რუსეთზე ზეწოლის გაზრდის აუცილებლობას ცეცხლის შეწყვეტისა და სამშვიდობო მოლაპარაკებების კუთხით.
„მინდა მადლობა გადავუხადო უკრაინას ამისთვის დიდი მზადყოფნისთვის, რადგან ვიცით, რომ რუსეთი აჭიანურებს და ჩვენ ამას ვერ შევეგუებით“, - დასძინა მინისტრმა.
მან აღნიშნა, რომ შესაბამისი ზომები მიიღება და ამის მაგალითია სანქციების მე-18 პაკეტის დამტკიცებისთვის მზადება.
„ჩვენ გვსურს დავარწმუნოთ ყველა ევროპელი პარტნიორი, რომ ეს პაკეტი ეფექტურია. ასევე ჩვენი ამერიკელი კოლეგები, რათა აშშ-მაც მიიღოს შესაბამისი ზომები. პუტინმა უნდა იცოდეს, რომ თუ რამე ცუდს ჩაიდენს, ეს შედეგების გარეშე არ დარჩება. და რაც უფრო ნათლად ჩამოვაყალიბებთ ამას, მით უკეთესი“, - თქვა ვადეფულმა.
