კვირას, 22 ივნისს, რუსებმა სარაკეტო თავდასხმა განახორციელეს უკრაინის არმიის ერთ-ერთი მექანიზებული ბრიგადის საწვრთნელ პოლიგონზე - დაიღუპა სულ მცირე სამი და დაიჭრა 14 ადამიანი.
უკრაინის შეიარაღებული ძალების სახმელეთო ჯარების სარდლობის კომუნიკაციების დეპარტამენტის უფროსმა, პოლკოვნიკმა ვიტალი სარანცევმა უკრაინული მედიისთვის მიცემულ კომენტარში განაცხადა, რომ ეს არის დროებითი საწვრთნელი პოლიგონი ქვეყნის სამხრეთში პორად შემადგენლობასთან დამატებითი წვრთნების ჩასატარებლად.
წინასწარი ინფორმაციით, რუსებმა პოლიგონზე „ისკანდერ-M“ ტიპის რაკეტით მიიტანეს იერიში.
„ეს არ იყო მუდმივი, არამედ დროებითი საწვრთნელი პოლიგონი. სამხედროები იქ არ ცხოვრობენ, ისინი მხოლოდ გარკვეული საწვრთნელი ამოცანების შესასრულებლად ჩადიან. დარტყმამდე რამდენიმე წუთით ადრე თითქმის მთელი პერსონალი თავშესაფრებში იმყოფებოდა. სამწუხაროდ, ზოგიერთმა სამხედრო მოსამსახურემ უსაფრთხოების ზომები უგულებელყო. მსხვერპლთა უმეტესობა სწორედ ისინი იყვნენ,“ - განაცხადა სარანცევმა.
თავდასხმის დროს, საწვრთნელ პოლიგონზე წვრთნები მიმდინარეობდა.
გარემოებების გასარკვევად შეიქმნა სპეციალური კომისია და ადგილზე სამართალდამცავი ორგანოები მუშაობენ. რუსეთის ფედერაციის მხრიდან განმეორებითი თავდასხმების შემთხვევაში, ასევე მიიღება დამატებითი უსაფრთხოების ზომები.
