სირიასა და ერაყში სამიზნეებზე აშშ-ის ავიარტყმების შემდეგ, რომლებიც მან იორდანიაში ამერიკულ ავიაბაზაზე თავდასხმის შემდეგ განახორციელა, ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში ჟოზეფ ბორელმა შეშფოთება გამოთქვა ახლო აღმოალეთში შემდგომი ესკალაციის საფრთხის გამო.
"ახლო აღმოსავლეთი არის ქვაბი, რომელიც შესაძლოა, აფეთქდეს. ამიტომ მოვუწოდებ ყველა მხარეს, თავიდან აიცილონ ესკალაცია. ყველამ უნდა გამოიჩინოს ძალისხმევა, რათა ვითარება არ გახდეს ფეთქებადსაშიში", - თქვა ბორელმა.
3 თებერვლის ღამეს აშშ-მა ერაყსა და სირიაში მდებარე ობიექტებზე დარტყმები განახორციელა, რომელიც, თეთრი სახლის განცხადებით, დაახლოებით ნახევარ საათს გაგრძელდა და წარმატებით დასრულდა. აშშ-ის პრეზიდენტმა ჯო ბაიდენმა განაცხადა, რომ დარტყმები საჭიროების შემთხვევაში გაგრძელდება.
იანვრის ბოლოს სირიის საზღვართან აშშ-ს ბაზაზე დრონით თავდასხმას სამი ამერიკელი სამხედრო ემსხვერპლა, 34 კი დაიჭრა. თეთრმა სახლმა თავდასხმაში ერაყში პროირანული ძალები დაადანაშაულა.
