რუსეთის პრეზიდენტის პრესსპიკერმა დმიტრი პესკოვმა კომენტარი გააკეთა აშშ-ის სახელმწიფო მდივნის მოადგილის ვიქტორია ნულანდის კიევში ვიზიტზე. მისი თქმით, შეერთებული შტატები ახდენს უკრაინის ხელისუფლების „პროვოცირებას“ ომის გასაგრძელებლად, მაგრამ ეს არ იმოქმედებს „სპეცოპერაციის“ მიმდინარეობაზე.
”აშშ, როგორც ამ კონფლიქტის უშუალო მონაწილე, ინარჩუნებს და ზრდის ამ კონფლიქტში მისი უშუალო ჩართულობის ხარისხს, აგრძელებს კიევის რეჟიმის პროვოცირებას ომის გასაგრძელებლად”, - თქვა დმიტრი პესკოვმა.
პესკოვის თქმით, ვიქტორია ნულანდის ვიზიტი და შეერთებული შტატების ქმედებები გავლენას ვერ მოახდენს ომის მიმდინარეობაზე. მისი თქმით, „სპეციალური სამხედრო ოპერაციის“ ყველა მიზანი მიღწეული იქნება. „ამერიკელები ზიანს აყენებენ უკრაინელებს. ამერიკელები იქცევიან ისე, რომ მეტი უკრაინელი დაიღუპოს. ამას სწორედ ამერიკელები აკეთებენ. და მათ ეს უნდა გაიგონ“, - თქვა დმიტრი პესკოვმა.
აშშ-ის სახელმწიფო მდივნის მოადგილე პოლიტიკურ საკითხებში ვიქტორია ნულანდი კიევს 31 იანვარს ეწვია. იგი შეხვდა საგარეო საქმეთა და თავდაცვის სამინიტროს წარმომადგენლებს. თავდაცვის მინისტრმა რუსტემ უმეროვმა განაცხადა, რომ მან სახელმწიფო მდივნის მოადგილესთან განიხილა „შემდგომი თანამშრომლობისა და სტრატეგიული პარტნიორობის გაძლიერების გზები“. ვიზიტის დროს ნულანდმა განაცხადა, რომ ამერიკის მიერ უკრაინითვის გადაცემული GLSDB-ის ტიპის მაღალი სიზუსტის რაკეტები უკვე გზაშია.
მისივე თქმით, პუტინს ბრძოლის ველზე სასიამოვნო სიურპრიზები ელის და უკრაინას წელს დამაჯერებელი მიღწევები ექნება.
