რუსეთის მოქალაქეების თითქმის მესამედს მიაჩნია, რომ 2024 წლის საპრეზიდენტო არჩევნები, ფარსია. იუწყება რუსული მედია.
Russian Field-ის სოციოლოგიური გამოკითხვის თანახმად, რუსეთის მოქლაქეების 30 პროცენტს არ სჯერა, რომ მომავალი არჩევნები სამართლანად ჩატარდება.
2024 წლის იანვარში ჩატარებული კვლევის მიხედვით, გამოკითხულთა 60% მომავალ არჩევნებს „სამართლიანად“ მიიჩნევს. კიდევ 9%-ს "უჭირს პასუხის გაცემა", 1%-მა კი უარი თქვა შესაბამის კითხვაზე პასუხის გაცემაზე.
„უმაღლესი განათლების არმქონე და ტელევიზიების აუდიტორიის რესპონდენტებს უფრო მეტად სჯერათ, რომ არჩევნები სამართლიანად ჩატარდება. მათ შორის, ვინც ხმის მიცემას აპირებს, ორი მესამედი მიიჩნევს, რომ არჩევნები იქნება სამართლიანი, ხოლო ვინც არ აპირებს ხმის მიცემას, ორი მესამედი დარწმუნებულია, რომ არჩევნები იქნება უსამართლო“, - წერს Russian Field.
არჩევნების „სამართლიანობის“ მიმართ გავრცელებული უნდობლობის მიუხედავად, რუსეთის მოქალაქეების აბსოლუტური უმრავლესობა მაინც აპირებს ამ არჩევნებში მონაწილეობას - ასეთი პასუხი გამოკითხვის მონაწილეთა 87%-მა გასცა. 11%-მა განაცხადა, რომ არ წავა ხმის მისაცემად, მათ შორის 5%-მა მიიღო მტკიცე გადაწყვეტილება („ნამდვილად არ აპირებს“), ხოლო კიდევ 6% „ალბათ“ არ მიიღებს მონაწილეობას.
Russian Field-ის თანახმად, ამავდროულად, რუსების თითქმის ნახევარი - 43% - მიიჩნევს, რომ მათ ხმას არ შეუძლია "შეცვალოს პოლიტიკური ვითარება ქვეყანაში". ისინი ძირითადად ახალგაზრდები არიან, რომლებიც „საგრძნობლად უფრო ხშირად აპოლიტიკურები არიან“, ასევე არიან ხანდაზმული მოქალაქეებიც.
საპრეზიდენტო არჩევნები რუსეთში 2024 წლის 15-17 მარტს გაიმართება. რუსული მედიის ცნობით, კრემლმა მიზნად დაისახა პუტინმა მეტი ხმა მიიღოს, ვიდრე 2018 წელს, როდესაც ცენტრალურმა საარჩევნო კომისიამ განაცხადა, რომ მან ამომრჩეველთა ხმების ის 76% მიიღო და ის გამარჯვებულად გამოაცხადა.
71 წლის პუტინი უკვე არის რუსეთის ყველაზე ხანგრძლივი მმართველი იოსებ სტალინის შემდეგ. ახალი ვადა მას საშუალებას მისცემს დარჩეს ხელისუფლებაში 30 წლის განმავლობაში და მოხსნას რუსეთის იმპერატორების რეკორდები.
ხელისუფლებაში ყოფნის ხანგრძლივობით, რუსეთის პრეზიდენტმა უკვე აჯობა პინოჩეტს (17 წელი), კიმ ჩენ ირს (17 წელი), ბენიტო მუსოლინის და ინდონეზიის დიქტატორ სუჰარტოს (20 წელი). მეხუთე ვადის შემთხვევაში, პუტინი გაუსწრებს ნიკოლაუ ჩაუშესკუს (24 წელი), მაო ძედუნს (27 წელი) და გაუტოლდება დომინიკელ გენერალ რაფაელ ტრუხილიოს (30 წელი), რომელმაც თავის თავს დედამიწაზე ღმერთის წარგზავნილი უწოდა .
