იტალიის პრემიერ-მინისტრი ჯორჯია მელონი და საფრანგეთის პრეზიდენტი ემანუელ მაკრონი ბოლო კვირების განმავლობაში ამზადებდნენ ნიადაგს, რათა დაერწმუნებინათ ვიქტორ ორბანი, არ დაებლოკა უკრაინისთვის 50 მილიარდი ევროს დახმარების გამოყოფა. ამის შესახებ Politico იუწყება.
მელონთან დაახლოებული გამოცემის წყაროს თქმით, იტალიის პრემიერმა ორბანის გარემოცვასთან კონტაქტების დამყარება დეკემბერში, ევროკავშირის სამიტამდე ერთი თვით ადრე დაიწყო.1-ელი თებერვლის წინა დღეს კი დელეგაციები გვიანობამდე მუშაობდნენ კომპრომისის მოსაძებნად.
მიმდინარე კვირაში იტალიის პრემიერ-მინისტრი უნგრეთის პრემიერს ესაუბრა ტელეფონითაც, გამართა მასთან ერთსაათიანი შეხვედრა ბრიუსელში სამიტამდე და 1-ელ თებერვალს დილით ევროსაბჭოს სხდომის დაწყებამდე.
„მან {მელონმა} რამდენჯერმე სცადა შუამავალი გამხდარიყო და როგორც ჩანს, ამჯერად ამ მცდელობამ იმუშავა“, -განუცხადა Politico-ს წყარომ.
ორბანის დარწმუნებაში დიდიროლი ითამაშა მაკრონმა, რომელიც ასევე აქტიურად ურთიერთობდა მასთან ბოლო კვირებში. იანვარში პირადი შეხვედრის დროს უნგრეთის პრემიერ-მინისტრს სთხოვა გაეზიარებინა თავისი ხედვა, თუ უკეთ როგორ მოეხდინათ აღმოსავლეთ ევროკავშირის ქვეყნების ინტეგრირება.
"მას არასოდეს სურდა ორბანის წინააღმდეგობა, პირიქით, სურდა ორბანის თავის მხარეს გადაყვანა. ეს არის მიდგომა, რომელიც დღეს შედეგს იძლევა", - განუცხადა Politico-ს საფრანგეთის პრეზიდენტთან დაახლოებულმა წყარომ.
ამ ქმედებებმა საშუალება მისცა ევროპის საბჭოს პრეზიდენტს, შარლ მიშელს, ძალიან სწრაფად გამოეცხადებინა შეთანხმება ევროკავშირის ლიდერებს შორის უკრაინისთვის 50 მილიარდი ევრო დახმარების გამოყოფის შესახებ დეტალური განხილვის გარეშე.
შეგახსენებთ, დღეს ევროკავშირმა უკრაინისთვის ფინანსური დახმარების სახით 50 მილიარდი ევროს გამოყოფა დაამტკიცა.
