რუსული კომპანიები თურქულ ბანკებში ანგარიშების დახურვის საფრთხის წინაშე დგანან, ხოლო ფიზიკური პირებისთვის საბანკო გახსნის პირობები მეტად გამკაცრდა. იუწყება გამოცემა "ვედომოსტი" ბიზნესის მბლობელებისა და ბიზნესასოციაციების ნაამბობზე დაყრდნობით.
Bloomberg-ისა და "კომერსანტის" ინფორმაციით, თურქულმა ბანკებმა რუსეთთან დაკავშირებული ტრანზაქციების შეჩერება გასული წლის ბოლოდან დაიწყეს.
"ვედომოსტი" კი ამტკიცებს, რომ ანგარიშები უკვე გაყინულია. უფრო მეტიც, თუ ადრე შეზღუდვები მოიცავდა სანქციების ქვეშ მყოფ კომპანიებს, ახლა ეს თითქმის ყველაზე გავრცელდა.
ფინანსური ბაზრის მონაწილეები აცხადებენ, რომ ვითარება გაუარესდა 2023 წლის დეკემბერში, როდესაც ძალაში შევიდა ევროკავშირის სანქციების მე-12 პაკეტი და აშშ-ს პრეზიდენტმა, ჯო ბაიდენმა ხელი მოაწერა განკარგულებას მეორადი სანქციების შესახებ. ორივე დოკუმენტი უკრაინაში მიმდინარე რუსეთის შეჭრის საპასუხოდ შედგა.
მეორადი სანქციების შემოღების წესი საშუალებას აძლევს აშშ-ის ხაზინის დეპარტამენტს, დააწესოს ზომები უცხოური ბანკების წინააღმდეგ, რომელიც რუსეთის სანქცირებული პირების ტრანზაქციებს ახორციელებენ ან ხელს უწყობენ გარკვეული მასალებისა და აღჭურვილობის მიწოდებას რუსეთის სამხედრო-სამრეწველო ინდუსტრიისთვის.
განკარგულების გამოქვეყნების შემდეგ, მეორადი სანქციების შიშით, თურქულმა ბანკებმა რუსული კომპანიებისა და ბანკების მნიშვნელოვანი ნაწილის საკორესპონდენტო ანგარიშები დახურეს.
"კომპანიებს ნამდვილად ურჩევენ დაასრულონ ოპერაციები ბანკებთან და დახურონ ანგარიშები", - ამბობს საერთაშორისო გადახდების კონსულტანტი ისკანდერ მირგალიმოვი.
ასევე, მისივე თქმით, თურქული ბანკები ამკაცრებენ ფიზიკურ პირებზე ანგარიშების გახსნის პირობებს - ახალი კლიენტების მხრიდან მაღალი სადეპოზიტო ნაშთების შენარჩუნების მოთხოვნაა.
