აშშ-ის ცენტრალური სადაზვერვო სამმართველოს დირექტორი უილიამ ბერნსი გამოცემა Foreign Affairs-ში გამოქვეყნებულ სტატიაში უკრაინაში რუსეთის არმიის დანაკარგებს აფასებს და ამბობს, რომ მიმდინრე წელს უკრაინის შეიარაღებულ ძალებს რთული პერიოდი ელოდება.
როგორც ბერნსი წერს, უკრაინაში თითქმის ორწლიანი ომის განმავლობაში სულ მცირე 315 ათასი რუსი ჯარისკაცი დაიღუპა და დაიჭრა.
გარდა ამისა, მისი თქმით, განადგურდა რუსეთის ომამდელი ტანკების მარაგის ორი მესამედი, პუტინის ათწლეულების განმავლობაში არმიის მოდერნიზაციის პროგრამა კი ამოიწურა.
ამერიკული დაზვერვის მსგავსი შეფასებების შესახებ დასავლური მედია გასული წლის ბოლოსაც იუწყებოდა. თუმცა, მაშინ ისინი მიუთითებდნენ არა ოფიციალურ განცხადებებზე, არამედ წყაროების მონაცემებზე, რომლებისთვისაც კარგად იყო ცნობილი დაზვერვის სამსახურების ანგარიშის შინაარსი.
როგორც BBC იტყობინება, უკრაინის დანაკარგები სახელმწიფო საიდუმლოებაა, ამიტომ ხელისუფლება დაღუპულთა რაოდენობას არ ამხელს. მაგრამ აგვისტოში ამერიკელმა ოფიციალურმა პირები, რომლებსაც New York Times ეყრდნობა, საუბრობდნენ 70 ათასი დაღუპულის და 120 ათასამდე დაჭრილი უკრაინელი ჯარისკაცის შესახებ.
ბერნსის პროგნოზით, „ეს წელი სავარაუდოდ რთული იქნება უკრაინისთვის ბრძოლის ველზე და იქნება გამძლეობის გამოცდა, რომლის შედეგებიც გასცდება ამ ქვეყნის გმირულ ბრძოლას მისი თავისუფლებისა და დამოუკიდებლობის შესანარჩუნებლად."
ამასთან, ბერნსის შეფასებით, პუტინის მიერ მიმდინარეობს რუსეთის სამხედრო მრეწველობის აღდგენა, „იღებს კრიტიკულ კომპონენტებს ჩინეთიდან, ასევე იარაღსა და საბრძოლო მასალას ირანიდან და ჩრდილოეთ კორეიდან“.
„[პუტინს] ფსონი ჯერ კიდევ დადებული აქვს იმაზე, რომ დრო მის მხარესაა, რომ მას შეუძლია გაანადგუროს უკრაინა და მისი დასავლელი მოკავშირეები. უკრაინის გამოწვევა არის პუტინის თავდაჯერებულობისთვის ძირის გამოთხრა და იმის დემონსტრირება, რომ კონფლიქტის გაგრძელება რუსეთს ძვირი დაუჯდება, - ამბობს ბერნსი .
მისი თქმით, ამერიკის შეერთებული შტატებისთვის გვერდზე გადგომა და ამ კრიტიკულ მომენტში უკრაინის დახმარების შეწყვეტა, საკუთარ კარში ისტორიული მასშტაბის გოლის გატანა იქნებოდა.
