აშშ ემზადება სპარსეთის ყურეში ირანის საზღვაო-სამხედრო ობიექტებზე ან სირიასა და ერაყში ირანულ პერსონალზე დარტყმებისთვის, იორდანიაში ამერიკულ სამხედრო ბაზაზე პროირანული მებრძოლების თავდასხმის საპასუხოდ. ამის შესახებ გამოცემა Politico-ს წყაროებმა განუცხადეს.
მათივე თქმით, პენტაგონი პრეზიდენტ ჯო ბაიდენის თანხმობას ელის. შეტევა დაიწყება ბაიდენის თანხმობის გაცემიდან რამდენიმე დღეში. წყაროების თქმით, იერიში, სავარაუდოდ, ტალღებად, რამდენიმე სამიზნის წინააღმდეგ განხორციელდება.
ამავდროულად, მანამდე განხორციელებულმა ზომებმა ვერ მოახდინა საკმარისი ეფექტი თეირანზე, ”ამიტომ ესკალაცია გარდაუვალია”, - თქვა ცენტრალური სადაზვერვო სამმართველოს (CIA) და პენტაგონის შტაბის ყოფილმა უფროსმა ჯერემი ბაშმა. ამასთან, ახლო აღმოსავლეთში სამშვიდობო მოლაპარაკებების მონაწილემ აარონ დევიდ მილერმა განაცხადა, რომ ამერიკის საპასუხო ზომები შეიცავს რეგიონალური ომის პროვოცირების რისკს.
„მათ იციან, რომ ირანს არ შეუძლია შეერთებულ შტატებთან პირდაპირ კონფლიქტში ჩართვა, მაგრამ ამან შესაძლოა, გამოიწვიოს ისრაელზე ან ამერიკულ აქტივებზე ჰეზბოლას თავდასხმების გააქტიურება”, - თქვა მილერმა.
28 იანვარს, იორდანიაში დრონით თავდასხმას 3 ამერიკელი ჯარისკაცი ემსხვერპლა, 34 კი დაშავდა.
ბაიდენმა თავდასხმაში პასუხისმგებლობა ირანის მიერ მხარდაჭერილ რადიკალურ მებრძოლ დაჯგუფებებს დააკისრა. თეირანმა უარყო ბრალდებები და აღნიშნა, რომ მას კავშირი არ აქვს თავდასხმასთან. მომხდარზე პასუხისმგებლობა „ერაყის ისლამურმა წინააღმდეგობამ“ აიღო.
