უკრაინის პრეზიდენტის ადმინისტრაციის ხელმძღვანელმა ანდრიი ერმაკმა განაცხადა, რომ უნგრეთის საგარეო საქმეთა მინისტრ პიტერ სიიარტოსთან მოლაპარაკებებმა დაადასტურა კიევისა და ბუდაპეშტის ერთობლივი სურვილი უმაღლესი დონის შეხვედრის გამართვის შესახებ.
უნგრელ კოლეგასთან შეხვედრაზე უკრაინის საგარეო საქმეთა მინისტრმა დმიტრო კულებამ აღნიშნა, რომ მხარს უჭერს ორ ქვეყანას შორის ურთიერთობების ნორმალიზებას.
„უკრაინის პრეზიდენტმა გვთხოვა მე და ანდრიი ერმაკს, სიღრმისეულად გვესაუბრა თქვენთან და გვეპოვა ურთიერთობების ნორმალიზების გზები, რადგან ჩვენ ვერ ვხედავთ რაიმე მიზეზს, რატომ არ უნდა გვქონდეს შესანიშნავი ურთიერთობები“, – განაცხადა უკრაინის საგარეო უწყების ხელმძღვანელმა.
ამასთან, ანდრიი ერმაკმა აღნიშნა, რომ შეხვედრის ერთ-ერთი მიზანია ვოლოდიმირ ზელენსკისა და უნგრეთის პრემიერ-მინისტრის, ვიქტორ ორბანის შეხვედრის მომზადება.
„დღეს ორივე მხარემ აბსოლუტურად მკაფიოდ განაცხადა, რომ არსებობს უნგრეთის პრემიერ-მინისტრისა და უკრაინის პრეზიდენტის შეხვედრის გამართვის ინტერესი. მე მჯერა, რომ დღეს ჩვენ გადავდგით ძალიან ძლიერი ნაბიჯი ამ შეხვედრისკენ. რა თქმა უნდა, ჩვენ ყველა დაინტერესებული ვართ, რომ ეს შეხვედრა წარმატებული იყოს და ახალი ფურცელი გაიხსნას ჩვენს ურთიერთობაში," - განაცხადა ერმაკმა.
ერმაკის თქმით, კონკრეტული თარიღები არ ყოფილა განხილული, თუმცა ორივე მხარემ გამოთქვა ინტერესი, რომ შეხვედრა უმოკლეს ვადაში გაიმართოს.
ერმაკის განცხადებით, კიევი დაინტერესებულია, რომ მომავალი შეხვედრა კონკრეტული შედეგებით დასრულდეს.
