უკრაინის თავდაცვის სამინისტროს მთავარმა სადაზვერვო სამმართველომ ილ-76-ის ჩამოვარდნასთან დაკავშირებით განცხადება გაავრცელა, რომელშიც რუსეთი დაადანაშაულა დაგეგმილ პროვოკაციაში, რომელიც მიზნად ისახავს პატიმართა სიცოცხლისა და უსაფრთხოებისთვის საფრთხის შექმნას.
უწყების განცხადებით, მოსკოვმა არ გააფრთხილა კიევი ბელგოროდის რაიონში საჰაერო სივრცის უსაფრთხოების უზრუნველყოფის აუცილებლობის შესახებ, როგორც ეს ჩვეულებრივ ხდება ტყვეების გაცვლისას.
უკრაინის დაზვერვის მთავარმა სამმართველომ აღნიშნა, რომ ჯერჯერობით არ აქვთ სანდო და დაზუსტებული ინფორმაცია იმის შესახებ, თუ ვინ იმყოფებოდა რუსულ „ილ-76“-ის თვითმფრინავში, რომელიც ბელგოროდის ოლქში ჩამოვარდა.
"ჩვენი დამცველების უსაფრთხოება, შეთანხმებების მიხედვით, რუსული მხარისგან უნდა ყოფილიყო უზრუნველყოფილი. ამავდროულად, უკრაინული მხარე არ იყო ინფორმირებული ქალაქ ბელგოროდის მიდამოში საჰაერო სივრცის უსაფრთხოების უზრუნველყოფის აუცილებლობის შესახებ გარკვეული პერიოდის განმავლობაში, როგორც არაერთხელ გაკეთებულა წარსულში. ცნობილია, რომ ტყვეების გადაყვანა ხდება საჰაერო, სარკინიგზო და საავტომობილო ტრანსპორტით. ეს შეიძლება, მიუთითებდეს რუსეთის მიერ მიზანმიმართულ ქმედებებზე, რომელიც მიზნად ისახავს პატიმართა სიცოცხლისა და უსაფრთხოებისთვის საფრთხის შექმნას", – აღნიშნულია განცხადებაში.
რუსეთი ამტკიცებს, რომ თვითმფრინავის ბორტზე იმყოფებოდა უკრაინის შეიარაღებული ძალების 65 ტყვედ გადაყვანილი სამხედრო მოსამსახურე, რომლებიც ბელგოროდის ოლქში გაცვლის მიზნით გადაჰყავდათ. ბორტზე ასევე იმყოფებოდნენ ეკიპაჟის 6 წევრი და 3 თანმხლები პირი.
მათივე ცნობით, ბორტზე მყოფი ყველა პირი დაიღუპა.
