ისრაელი და "ჰამასი", რომელიც ევროკავშირისა და აშშ-ის მიერ ტერორისტულ ორგანიზაციად არის აღიარებული, 30 დღით ცეცხლის შეწყვეტაზე შეთანხმდნენ, პალესტილენი ტყვეებისა და ისრაელელი მძევლების გათავისუფლების სანაცვლოდ. იტყობინება სააგენტო Reuters-ი წყაროებზე დაყრდნობით.
სააგენტოს ინფორმაციით, საუბარის წინასწარ შეთანხმებაზე, საომარი მოქმედებების შეწყვეტის პორობებთან დაკავშირებით გარკვეული უთანხმოებები კვლავ არსებობს, რის გამოც ზავის დადება ჭიანურდება, თუმცა შეთანხმების დამტკიცება ნებისმიერ დროს არის მოსალოდნელი.
წყაროების ცნობით, "ჰამასი" ითხოვს დამატებით გარანტიებს ცეცხლის მუდმივი შეწყვეტის შესახებ, ვიდრე დათანხმდება დროებით ზავს და მძევლების გათავისუფლებას.
ისრაელი და შუამავლები - შეერთებული შტატები, ეგვიპტე და კატარი - ცდილობენ ეტაპობრივად წარმართონ მოლაპარაკებები, განიხილონ სხვადასხვა კატეგორიის მძევლების ეტაპობრივი გაცვლის პირობები.
გამოცემა Axios-ის ინფორმაციით, დროებითი ზავის დადების ინიციატივით ისრაელი გამოვიდა, რათა სანაცვლოდ "ჰამასს" ისრაელელი მძევლები გაეთავისუფლებინა.
ისრაელის წინადადება მოიცავს ყველა მძევლის გათავისუფლებას და გარდაცვლილ მძევალთა ცხედრების დაბრუნებას. პირველ ეტაპზე უნდა გათავისუფლდნენ 60 წელს უფროსი კაცებისა და ქალების, ასევე ჯანმრთელობის პრობლემების მქონე მძევლები. შემდეგი ეტაპი კი მოიცავს ყველა სხვა მძევლის, მათ შორის ქალი სამხედროების, 60 წლამდე ასაკის ადამიანებისა და ისრაელის სამხედროების გათავისუფლებას.
სანაცვლოდ, ისრაელმა ჰამასს უნდა გადასცეს ისრაელის ციხეებში მყოფი პალესტინელი პატიმრები.
Reuters-ი ინფორმაციით, "ჰამასი" შიშობს, რომ ისრაელს შეუძლია განაახლოს საბრძოლო მოქმედებები მძევლების გათავისუფლების შემდეგ.
"ჰამასის" ერთ-ერთი წარმომადგენლის თქმით, ისრაელმა მათ შესთავაზა ომის დასრულება, თუ ისინი ღაზის სექტორს დაატოვებინებდნენ რადიკალური მოძრაობის 6 ლიდერს, მათ შორის პოლიტიკური ბიუროს მეთაურს იაჰია სინვარს. წყაროს ცნობით, "ჰამასმა" კატეგორიულად უარყო ეს წინადადება.
ისრაელს ოფიციალურად ჯერ არ დაუდასტურებია Reuters-ის ინფორმაცია. სააგენტოს რამდენიმე წყარო ირწმუნება, რომ ისრაელმა უარი თქვა ომის დასრულებაზე ჰამასის ლიკვიდაციის გარეშე.
ახლო აღმოსავლეთში კონფლიქტის ესკალაცია მას შემდეგ დაიწყო, რაც 2023 წლის 7 ოქტომბერს ევროკავშირისა და შეერთებული შტატების მიერ ტერორისტულ ორგანიზაციად აღიარებულმა რადიკალურმა ისლამისტურმა მოძრაობამ ჰამასმა განახორციელა ფართომასშტაბიანი თავდასხმა ისრაელზე.
ტერორისტები ისრაელის ტერიტორიაზე შეიჭრნენ, დახოცეს ასეულობით ადამიანი და მძევლად აიყვანეს. ამ ხოცვა-ჟლეტას 1200-ზე მეტი ადამიანი ემსხვერპლა ისრაელში. პალესტინური მხარის ინფორმაციით, ისრაელის საპასუხო შეტევებს 25 000-ზე მეტი ადამიანი შეეწირა.
