პოლონეთი და უკრაინა მზად არიან დაასრულონ მოლაპარაკებები იარაღისა და საბრძოლო მასალის ერთობლივ წარმოებაში ინვესტიციების შესახებ, განაცხადა პოლონეთის ახალმა პრემიერ-მინისტრმა დონალდ ტუსკმა ორშაბათს, კიევში უკრაინის პრეზიდენტ ვლადიმერ ზელენსკისთან მოლაპარაკების შემდეგ.
დონალდ ტუსკის უკრაინაში ვიზიტი 22 იანვარს დაიწყო მისი სურვილის ფონზე, განამტკიცოს ვარშავასა და კიევს შორის ურთიერთობები, რამდენიმეთვიანი პოლიტიკური დაძაბულობის შემდეგ.
"არ არსებობს უფრო მნიშვნელოვანი საკითხი, ვიდრე უკრაინის მხარდაჭერაა - ეს არის ნომერ პირველი საკითხი", - თქვა ტუსკმა ორშაბათს პოლონურ ტელეარხთან ინტერვიუში.
ტუსკის ვიზიტი კიევში დაემთხვა უკრაინის ერთიანობის დღეს, რომელიც აღინიშნება 1919 წელს დასავლეთ და აღმოსავლეთ უკრაინის გაერთიანების პატივსაცემად.
ტუსკს კიევში უკრაინის პრემიერ-მინისტრი დენის შმიგალი შეხვდა. ასევე გაიმართა მოლაპარაკებები ტუსკსა და უკრაინის პრეზიდენტ ვოლოდიმირ ზელენსკის შორის.
ზელენსკის თქმით, უკრაინა და პოლონეთი შეძლებენ ორ ქვეყანას შორის პრობლემური საკითხების გადაჭრას.
ვარშავა უკრაინის მთავარი მოკავშირე გახდა 2022 წლის თებერვალში რუსეთის შეჭრის შემდეგ. იგი აქტიურად ლობირებს დასავლელ მოკავშირეებს, რათა კიევს მეტი ფინანსური და სამხედრო დახმარება გაუწიონ. უკრაინაში ომის დაწყების შემდეგ პოლონეთმა მილიონზე მეტი უკრაინელი ლტოლვილი მიიღო.
