ჩრდილოეთ კორეის განცხადებით, რუსეთის პრეზიდენტი ვლადიმირ პუტინი შესაძლოა ახლო მომავალში ფხენიანს ეწვიოს. ინფორმაციას ჩრდილოეთ კორეის სახელმწიფო მედიაზე დაყრდნობით, Bloomberg-ი ავრცელებს.
როგორც იუწყებიან, ჩრდილოეთ კორეის საგარეო საქმეთა მინისტრმა მოსკოვში ვიზიტისას პუტინი ფხენიანში მიიწვია. საპასუხოდ, პუტინმა მადლიერება გამოთქვა მიწვევისთვის და განაცხდა, რომ რაც შეიძლება მალე ეწვევა ჩრდილოეთ კორეას.
ჩრდილოეთ კორეის საგარეო საქმეთა მინისტრი 15-დან 17 იანვრამდე რუსეთში იმყოფებოდა ორ ქვეყანას შორის „სტრატეგიული და ტაქტიკური თანამშრომლობის“ გასაძლიერებლად.
რუსეთმა მადლობა გადაუხადა ჩრდილოეთ კორეას "რუსეთის მთავრობისა და მისი ხალხის სრული მხარდაჭერისა და სოლიდარობისთვის, უკრაინაში გაჩაღებულ ომთან დაკავშირებით".
რუსეთმა გააძლიერა თანამშრომლობა ჩრდილოეთ კორეასთან 2022 წელს უკრაინაში სრულმასშტაბიანი შეჭრის შემდეგ. ცნობილია, რომ ფხენიანმა მოსკოვს გადასცა საარტილერიო ჭურვები და ბალისტიკური რაკეტები, რომელიც გამოიყენეს უკრაინის წინააღმდეგ.
