თეთრი სახლის ეროვნული უსაფრთხოების საბჭოს სპიკერის, ჯონ კირბის განცხადებით, შეერთებულმა შტატებმა 19 იანვარს მორიგი შეტევა განახორციელა იემენის "ჰუსიტების" სამიზნეთა წინააღმდეგ.
"ამ დილით აშშ-ის ძალებმა განახორციელეს სამი წარმატებული თავდაცვითი დარტყმა იემენში ჰუსიტების სამიზნეებზე", - თქვა კირბიმ.
მისი თქმით, ეს იყო მეოთხე პრევენციული ქმედება, რომელიც განხორციელდა ამერიკელი სამხედროების მიერ "ჰუსიტების" სარაკეტო დანადგარების წინააღმდეგ.
ერთი დღით ადრე, პრეზიდენტმა ჯო ბაიდენმა განაცხადა, რომ აშშ-ის სამხედრო ჩარევამ ვერ შეაჩერა "ჰუსიტები" რეგიონში თავდასხმებისგან და ის კვლავ განაგრძობს საჰაერო შეტევის ბრძანების გაცემას.
ირანის მიერ მხარდაჭერილი იემენელი ამბოხებული "ჰუსიტები" გასული წლის ნოემბრიდან თავს ესხმიან დასავლეთის კომერციულ ხომალდებს, რომლებიც წითელ ზღვას გადიან. ამბოხებულთა განცხადებით, მათი ეს ქმედება პროტესტია ღაზას სექტორში ისრაელის სამხედრო ოპერაციის წინააღმდეგ და პირობა დადეს, რომ თავს დაესხმებიან ისრაელთან დაკავშირებულ ყველა გემს.
12 იანვრის ღამეს შეერთებულმა შტატებმა და დიდმა ბრიტანეთმა, ნიდერლანდების, კანადის, ავსტრალიისა და ბაჰრეინის მხარდაჭერით, მასიური თავდასხმები დაიწყეს იემენში "ჰუსიტთა" სამხედრო ობიექტებზე.
