ევროკავშირმა დაიწყო მსჯელობა სანქციების მორიგ, მე-13 პაკეტზე, რომლის დამტკიცებასაც მიზნად ისახავს 24 თებერვლამდე, რუსეთის უკრაინაში შეჭრის მეორე წლისთავამდე. ინფორმაციას დიპლომატიურ წყაროებზე დაყრდნობით Bloomerg-ი ავრცელებს.
მოსალოდნელია, რომ სანქციების ახალი პაკეტი კიდევ უფრო გააფართოვებს პერსონალური სანქციების სიას, მოიცავს დამატებით სავაჭრო შეზღუდვებს. ამასთან, მოელიან, რომ გამკაცრდება ბრძოლა კრემლის მცდელობების წინააღმდეგ, გვერდი აუაროს ევროკავშირის სანქციებს როგორც მესამე ქვეყნების, ასევე ევროკავშირის ფარგლებში არსებული კომპანიების მეშვეობით.
Bloomberg-ის ინფორმაციით, სანქციების მე-13 პაკეტის დამტკიცება 24 თებერვლამდე იოლი არ იქნება, რადგან წინა პაკეტზე შეთანხმებას მრავალი კვირა დასჭირდა. თუმცა, მიმდინარე კვირაში ევროკავშირის ელჩებმა უკვე განიხილეს სანქციების ზოგადი მონახაზი.
გარდა ამისა, ევროკავშირში მიმდინარეობს დისკუსიები უკრაინის სამხედრო მხარდაჭერისთვის ახალი ფონდის შექმნის თაობაზე. ევროკავშირის ზოგიერთ ქვეყანას სურს, ახალი ფონდი გამოიყენოს უკვე არსებული დაფინანსების მექანიზმის მოდერნიზებისთვის, რომელიც ევროპის მშვიდობის ფონდის სახელითაა ცნობილი.
ევროკავშირის საგარეო ქმედებათა სამსახური წინადადებით, ფონდის წლიური ბიუჯეტი 5 მილიარდი ევროთი განისაზღვროს, თუმცა ამ საკითხზე კონსენსუსის მიღწევა ვერ მოხერხდა. იუწყებიან, რომ მზადდება ახალი წინადადებების პაკეტი.
