ამერიკის შეერთებული შტატების მეორადი სანქციების შიშით, თურქული ბანკები უარს ამბობენ რუსულ ბანკებთან თანამშრომლობაზე. იუწყება გამოცემა „კომერსანტი“.
თითქმის ყველა თურქულმა ბანკმა უკვე გაწყვიტა საკორესპონდენტო ურთიერთობა რუსეთში საკრედიტო ინსტიტუტებთან და შეაჩერა მათი გადახდების დამუშავება. მედიის ცნობით, გამონაკლისი მხოლოდ რუსეთში უცხოური ბანკების შვილობილი კომპანიებისთვის ვრცელდება.
ფინანსური ბაზრის მონაწილეები აცხადებენ, რომ ვითარება გაუარესდა 2023 წლის დეკემბერში, როდესაც ძალაში შევიდა ევროკავშირის სანქციების მე-12 პაკეტი და აშშ-ს პრეზიდენტმა, ჯო ბაიდენმა ხელი მოაწერა განკარგულებას მეორადი სანქციების შესახებ. ორივე დოკუმენტი უკრაინაში მიმდინარე რუსეთის შეჭრის საპასუხოდ შედგა.
თურქული ბანკები შიშობენ, რომ აშშ-ს სანქციების სიაში შეყვანა და ამით მათი დოლარის გადახდებისგან გათიშვა გამოიწვევს ადგილობრივი კლიენტების გადინებას. გამოცემა „კომერსანტის“ წყაროები ვარაუდობენ, რომ თუ თურქული ბანკებისთვის რისკები ძალიან მაღალი აღმოჩნდება, მაშინ რუსეთისთვის ერთადერთი ეფექტიანი ვარიანტი იქნება თურქეთთან ანგარიშსწორება სხვა ქვეყნების - მაგალითად, დსთ-ს ბანკების მეშვეობით.
მანამდე ცნობილი გახდა, რომ რუს კლიენტებთან მუშაობის პირობებს ჩინური ბანკებიც ამკაცრებენ. ისინი ასევე შიშობენ აშშ-ის მეორადი სანქციების გამო.
