ავსტრიელი სექსუალური მოძალადის, იოზეფ ფრიცლის ადვოკატი, მისი დაცვის ქვეშ მყოფის მკაცრი რეჟიმის ციხიდან ჩვეულებრივ საპატიმროში, ან მოხუცთა თავშესაფარში გადაყვანას ითხოვს.

იოზეფ ფრიცლის საკუთარი ქალიშვილი 24 წლის განმავლობაში გამოკეტილი ჰყავდა და მასზე სექსუალურად ძალადობდა. დატყვევებულმა და ძალადობის მსხვერპლმა გოგონამ მამისგან 7 შვილი გააჩინა.

ადვოკატის განცხადებით, იგი იმედოვნებს, რომ სასამართლო ფრიცლის მოხუცთა თავშესაფარში გადაყვანას ან გათავისუფლებას დათანხმდება.

იოზეფ ფრიცლის, რომელიც ახლა 88 წლისაა, 2009 წელს სასამართლომ უვადო პატიმრობა მიუსაჯა საკუთარი შვილის გაუპატიურების, ინცესტის, მისი და მისი შვილების დამონებისა და თავისუფლების აღკვეთის გამო.

ახალ ფსიქიატრიულ დასკვნაში ნათქვამია, რომ ფრიცლი, რომელსაც დემენცია აქვს, საზოგადოებისთვის საფრთხეს აღარ წარმოადგენს.

იოზეფ ფრიცლმა საკუთარი ქალიშვილი ელიზაბეთი, 1984 წელს, როდესაც ის 18 წლის იყო სახლის სარდაფში გამოკეტა და ყველას, მათ შორის თავის მეუღლეს უთხრა, რომ გოგონა გაიქცა და საკულტო ორგანიზაციას შეუერთდა.

ფრიცლი ქალიშვილის 11 წლის ასაკიდან აუპატიურებდა.

პოლიციისა და საზოგადოებისთვის შემაძრწუნებელი დანაშაულის შესახებ მაშინ გახდა ცნობილი, როდესაც ელიზაბეთის ერთ-ერთი ქალიშვილი მძიმედ გახდა ავად, რის გამოც ექიმებს მიმართა. ფრიცლიმ ელიზაბეთი სარდაფიდან გაათავისუფლა და განაცხადა, რომ თითქოს მრავალი წლის შემდეგ ოჯახს დაუბრუნდა, თუმცა ქალმა პოლიციას სიმართლე უამბო.

ავსტრიის კანონმდებლობით, ყველას, ვისაც უვადო პატიმრობა აქვს მისჯილი, 15 წლის შემდეგ, ექვემდებარება პირობით გათავისუფლებას და ფრიცლმა, რომელიც 2008 წელს დააკავეს, ამ ზღვარს 2023 წელს მიაღწია.