ისლანდიაში, ვულკანის ამოფრქვევის შემდეგ, ლავამ პატარა ქალაქ გრინდავიკამდე მიაღწია, საიდანაც მოსახლოების ევაკუაცია წინასწარ განხორციელდა.
ლავამ მიაღწია ქალაქის ქუჩებს და რამდენიმე სახლი დაფარა. ქალაქიდან - თითქმის 4 ათასი ადამიანია ევაკუირებული.
ვიდრე ლავა ქალაქამდე მიაღწევდა, დასახლებული პუნქტის უახლოესი სახლებიდან სულ რაღაც 50 მეტრში ახალი ნაპრალი გაჩნდა.
გრინდავიკის მერმა ფანარ იუნასონმა მანამდე ვულკანის ამოფრქვევას უწოდა "დიდი და სერიოზული შოკი მოსახლეობისთვის". მან განმარტა, რომ ამოფრქვევა საკმაოდ ახლოს ხდება და ამიტომ ლავა ქალაქამდე მალე მიაღწევდა.
ისლანდიის პრეზიდენტმა გუდნი იოჰანესონმა კვირას განაცხადა, რომ ადამიანთა სიცოცხლეს საფრთხე არ ემუქრება, თუმცა ინფრასტრუქტურა შესაძლოა საფრთხის ქვეშ აღმოჩნდეს.
მანამდე გრინდავიკის რაიონში დაიწყო სამუშაოები მიწისა და ქვებისგან ბარიერების შესაქმნელად, რათა ლავას ქალაქამდე არ მიეღწია. ისლანდიის მეტეოროლოგიური სამსახურის სეისმური საფრთხის სპეციალისტმა ბენედიქტ გალდორსონმა აღნიშნა, რომ ლავის ნაკადის ნაწილი კაშხლის გასწვრივ მოძრაობდა დასახლებული პუნქტიდან მოშორებით.
ქალაქ გრინდავიკის სიახლოვეს მიწისძვრების სერია და ვულკანის ამოფრქვევა გასული წლის ნოემბერშიც მოხდა. მაშინაც განხორციელდა მოსახლეობის ევაკუაცია, რომლებიც საკუთარ სახლებს მხოლოდ რამდენიმე კვირის შემდეგ, 22 დეკემბერს დაუბრუნდნენ.
