BBC-მ გამოცემა "მედიაზონასთან" და მოხალისეების ჯგუფთან ერთად დაადგინა 41 732 რუსი სამხედროს ვინაობა, რომლებიც უკრაინაში 2022 წლის თებერვალში რუსეთის შეჭრის შემდეგ დაიღუპნენ. მედიის ცნობით, მათ შორის 1 100-ზე მეტი სამხედრო 20 წელზე ნაკლები ასაკის იყო.
დაღუპულთა რიცხვში ასევე შედიან დაჯგუფება "ვაგნერის" წევრები, თუმცა არ შედიან ოკუპირებული დონეცკისა და ლუჰანსკის დანაყოფების სამხედროები, რომლებიც რუსეთის მხარეს იბრძოდნენ.
BBC ვარაუდობს, რომ მათ მიერ მოპოვებული სია შეიძლება შეიცავდეს დაღუპულთა სულ მცირე ნახევარს, ვიდრე რეალურად არის დაკრძალული რუსეთში. ამ დასკვნამდე გამოცემა მივიდა ბოლო 22 თვის განმავლობაში რუსეთის 70 დასახლებაში არსებული სასაფლაოების ვითარების სისტემატური შესწავლით.
აქედან გამომდინარე, ყველაზე ფრთხილი შეფასებით, სექტემბრის ბოლოსთვის რუსეთს შესაძლოა დაეკარგა 83 500 ადამიანი.
როგორც გამოცემა აღნიშნავს, რუსული მხარის დანაკარგების საერთო რაოდენობა მნიშვნელოვნად გაიზრდება, თუ სიაში შევლენ ისინიც, ვინც იბრძოდა უკრაინის წინააღმდეგ, თვითგამოცხადებული დონეცკისა და ლუჰანსკის რესპუბლიკების "სახალხო მილიციის" შემადგენლობაში.
2022 წლის 22 დეკემბრიდან "დონეცკის სახალხო რესპუბლიკის" ე.წ. ხელისუფლებამ შეწყვიტა მონაცემების გამოქვეყნება მათი სამხედრო მოსამსახურეების დანაკარგების შესახებ ("ლუჰანსკის სახალხო რესპუბლიკას" კი დანაკარგების შესახებ საერთოდ არ გამოუქვეყნებია ინფორმაცია).
BBC სხვადასხვა მონაცემის მიხედვით, მივიდა დასკვნამდე, რომ იანვრის შუა რიცხვებისთვის დონბასის თვითაღიარებული "რესპუბლიკებიდან" 23 500 სამხედრო დაიღუპა.
გამოცემის თანახმად, ამის გათვალისწინებით, უკრაინაში რუსეთის მხარეზე მებრძოლი ძალების ჯამური დანაკარგი შესაძლოა 107 000 დაღუპულს აღემატებოდეს. მძიმედ დაჭრილებისა და დაკარგულების გათვალისწინებით, რუსული ძალების ჯამური დანაკარგი კი შეიძლება იყოს 321 000 ადამიანი.
რუსეთის თავდაცვის სამინისტრომ ინფორმაცია დაღუპულთა საერთო რაოდენობის შესახებ ბოლოს 2022 წლის 21 სექტემბერს გაავრცელა და განცხადა, რომ 5937 რუსი სამხედრო დაიღუპა. ამის შემდეგ უწყებამ დაღუპულების შესახებ ინფორმაცია კიდევ სამჯერ გაავრცელა და 162 ადამიანის დაღუპვა დაადასტურა.
გასული წლის ივნისში ცნობილი გახდა, რომ თავდაცვის სამინისტრომ მიმართა რამდენიმე რეგიონის ხელისუფლებას, არ გამოექვეყნებინათ დაღუპული ჯარისკაცების ნეკროლოგები. ასეთი მოთხოვნის შესახებ კარგად იციან ბურიატიის, ტუვასა და ხაკასიას წარმომადგენლებმა, სადაც განსაკუთრებით ბევრი დანაკარგია.
