2023 წელი იყო რეკორდულად ყველაზე ცხელი, მაგრამ 2024 შესაძლოა, კიდევ უფრო ცხელი აღმოჩნდეს. გასული წლის ივნის-დეკემბრში ყოველთვიურად ახალი ტემპერატურის რეკორდები მყარდებოდა. ეს ტენდენცია, სავარაუდოდ, 2024 წელსაც გაგრძელდება ელ-ნინიოს (ანომალიური და გლობალური კლიმატური მოვლენა. თბილი სეზონური ზედაპირული დინება წყნარი ოკეანის აღმოსავლეთ ნაწილში. ჩნდება სამ ან შვიდ წელიწადში ერთხელ ცივი დინების გაქრობის შემდეგ და გაბატონებულია არანაკლებ ერთი წელი. ჩვეულებრივ, ისახება დეკემბერში, ემთხვევა საშობაო დღესასწაულებს, საიდანაც მოდის სახელწოდება — „ელ-ნინიო“, რაც ნიშნავს „ბავშვს“, იგულისხმება იესო ქრისტე.) კლიმატური ფენომენის გამო. ამის შესახებ ნათქვამია მსოფლიო მეტეოროლოგიური ორგანიზაციის 2023 წლის ანგარიშში.
ამით ორგანიზაციამ დაადასტურა ევროპის მეოტეოროლოგიური სამსახურის მონაცემები, რომლის მიხედვითაც 2023 წელი 1850 წლის შემდეგ ყველაზე ცხელი წელი გახდა. ორგანიზაციის ხელმძღვანელმა სელესტე საულომ განაცხადა, რომ ელ-ნინიოს გამო 2024 წელს ახალი რეკორდები იქნება მოსალოდნელი. „რადგან ელ ნინიო, როგორც წესი, ყველაზე დიდ გავლენას ახდენს გლობალურ ტემპერატურაზე, მან პიკს მიაღწია 2023 წელს და 2024 წელი, შესაძლოა, კიდევ უფრო ცხელი აღმოჩნდეს“, - განმარტა მან.
ორგანიზაციის ანგარიშში ნათქვამია, რომ გასულ წელს, საშუალო გლობალური ტემპერატურა 1,45 გრადუსით მეტი იყო, ვიდრე წინაინდუსტრიულ პერიოდში (1850 წლიდან 1900 წლამდე). ეს დასკვნა ეფუძნება არაერთი აღიარებული ინსტიტუტის მიერ მოპოვებულ მონაცემებს. ამასთან, 9 იანვარს გამოქვეყნებული Copernicus-ის მონაცემებით, საშუალო გლობალური ტემპერატურა 1,48 გრადუსით მეტი იყო.
კლიმატის ცვლილების კატასტროფული შედეგების თავიდან აცილების მიზნით, მსოფლიო საზოგადოებამ 2015 წელს გააფორმა პარიზის შეთანხმება, რომლის მიხედვითაც გლობალური დათბობა უნდა შემოიფარგლოს ორ გრადუსზე ნაკლებით და სასურველია 1,5 გრადუსით წინაინდუსტრიულ ეპოქასთან შედარებით.
ამერიკის ოკეანისა და ატმოსფერული კვლევითი ეროვნული სააგენტოს (NOAA) მონაცემებით, 2023 წელს დედამიწის ზედაპირზე საშუალო გლობალური ტემპერატურა 1,18 გრადუსით მეტი იყო მთელი მეოცე საუკუნის საშუალო მაჩვენებელზე. სელესტე საულომ კლიმატის ცვლილებას კაცობრიობის ყველაზე დიდი გამოწვევა უწოდა.
