საბერძნეთის პრემიერ-მინისტრმა კირიაკოს მიცოტაკისმა დაადასტურა ხელისუფლების განზრახვა ერთნაირსქესიანთა ქორწინების ლეგალიზებისა და ერთნაირსქესიანთა წყვილებისთვის შვილის აყვანის უფლების შესახებ.
მიცოტაკისის თქმით, ერთნაირსქესიანთა ქორწინების შესახებ საკანონმდებლო ინიციატივა არ განსხვავდება იმისგან, რაც უკვე არსებობს ევროპის ბევრ ქვეყანაში. თუმცა აღნიშნა, რომ "მარტოხელა კაცს სუროგატი დედისგან არ შეუძლია შვილის ყოლა".
საბერძნეთის პრემიერმა დაადასტურა, რომ არ აიძულებს თავის მემარჯვენე პარტიას "ახალი დემოკრატია" ხმას მისცეს ინიციატივას კენჭისყრისას და შეეცდება მოძებნოს კომპრომისი ბერძნულ საზოგადოებაში, რომელზეც მნიშვნელოვანი გავლენა აქვს მართლმადიდებლურ ეკლესიას.
„აბსოლუტურად პატივს ვცემ ჩვენს თანამოქალაქეებს, რომლებსაც განსხვავებული შეხედულებები აქვთ და პატივს ვცემ ეკლესიის მოსაზრებას, მაგრამ მინდა შეგახსენოთ, რომ ეკლესია წინააღმდეგი იყო სამოქალაქო ქორწინების, ეწინააღმდეგებოდა კრემაციას და სახელმწიფომ გადადგა ნაბიჯი და დააკანონა [ისინი] ეკლესიის როლის მიმართ პატივისცემასთან ერთად, - თქვა მან.
ამასთან, მიცოტაკისის თქმით, საბერძნეთის მთავრობის კონკრეტული საკანონმდებლო წინადადება ერთნაირსქესიანთა ქორწინებისა და შვილად აყვანის შესახებ უპირველეს ყოვლისა საზოგადოებას განხილვისთვის წარედგინება.
