პოლონეთის შინაგან საქმეთა ყოფილმა მინისტრმა მარიუშ კამინსკიმ, რომელიც პოლიციამ პრეზიდენტის სასახლეში ყოფილ მოადგილესთან ერთად დააკავა, შიმშილობა გამოაცხადა.
კამინსკის განცხადებით, მისი დაკავება და დეპუტატის მანდატის ჩამორთმევა პოლიტიკურ შურისძიებაა. „ამიტომ როგორც პოლიტპატიმარი, დაკავების პირველივე დღიდან ვიწყებ შიმშილობას.
მოვითხოვ, დაუყოვნებლივ გათავისუფლდნენ პატიმრობიდან პოლონეთის ანტიკორუფციული ცენტრალური ბიუროს ყოფილი ხელმძღვანელობის ყველა წევრი, რომლებზეც ვრცელდება 2015 წელს პოლონეთის რესპუბლიკის პრეზიდენტის მიერ გამოცემული შეწყალების აქტი“, - განაცხადა კამინსკიმ.
პოლონეთის იუსტიციის მინისტრის მოადგილის განცხადებით, ეს მარიუშ კამინსკის ინდივიდუალური გადაწყვეტილებაა. მისივე თქმით, კამინსკი და მისი ყოფილი მოადგილე მაცეი ვონსიკი არ შეესაბამებიან ევროპულ კრიტერიუმებს, რომ პოლიტიკურ პატიმრებად იყვნენ მიჩნეული.
შეგახსენებთ, პოლონეთის პოლიციამ უფლებამოსილების ბოროტად გამოყენებისთვის მსჯავრდებული პოლიტიკოსები - მარიუშ კამინსკი და მაცეი კამინსკი პრეზიდენტის სასახლეში დააკავა.
კამინსკი და ვონსიკი, უფლებამოსილების ბოროტად გამოყენების ბრალდებით, 2007 წელს განხორციელებული ქმედებებისთვის გაასამართლეს. ანჯეი დუდამ ისინი 2015 წელს შეიწყალა, თუმცა გასული წლის ივნისში პოლონეთის უზენაესმა სასამართლომ მათი შეწყალების გადაწყვეტილება გააუქმა. ამის შემდეგ პოლიტიკოსები სასამართლოს წინაშე წარდგნენ. დეკემბრის მიწურულს ვარშავის რაიონულმა სასამართლომ მათ ორი წლით თავისუფლების აღკვეთა მიუსაჯა.
ქვეყნის პრემიერ-მინისტრმა, დონალდ ტუსკმა პრეზიდენტი ანჯეი დუდა პოლიტიკოსების დაპატიმრების ხელის შეშლაში დაადანაშაულა.
პოლიტიკოსების დაკავება პრეზიდენტის სასახლის წინ ასობით ადამიანმა გააპროტესტა.
