პოლონეთის პოლიციამ უფლებამოსილების ბოროტად გამოყენებისთვის ორი მსჯავრდებული პოლიტიკოსი პრეზიდენტის სასახლეში დააკავა.
მედიის ცნობით, ქვეყნის შინაგან საქმეთა ყოფილი მინისტრი, მარიუშ კამინსკი და მისი ყოფილი მოადგილე მაცეი ვონსიკი პრეზიდენტის სასახლეში ანჯეი დუდას მიწვევით სამშაბთს დილით მივიდნენ, რის შემდეგც იქ დარჩნენ. მოგვიანებით, როდესაც პრეზიდენტი ბელარუს ოპოზიციონერთან სვეტლანა ტიხანოვსკაიასთან შესახვედრად გაემგზავრა, შენობაში პოლიციის თანამშრომლები შევიდნენ და პოლიტიკოსები დააკავეს.
პოლონეთის პრეზიდენტის ოფისში განაცხადეს, რომ დუდას განზრახული ჰქონდა შეხვედრის გაგრძელება კამინსკისთან და ვონსიკთან. მათივე თქმით, პრეზიდენტის სტუმრების დაკავება ლახავს პოლონეთის სახელმწიფოს ღირსებას და იმ პირთა ღირსებას, ვინც შეიწყალა პრეზიდენტმა.
დაკავებულების ადვოკატის თქმით, ისინი ვარშავის პოლიციის VII განყოფილებაში იმყოფებიან და, სავარაუდოდ, რამდენიმე საათში წინასწარი დაკავების იზოლატორში გადაიყვანენ.
კამინსკი და ვონსიკი, უფლებამოსილების ბოროტად გამოყენების ბრალდებით, 2007 წელს განხორციელებული ქმედებებისთვის გაასამართლეს. ანჯეი დუდამ ისინი 2015 წელს შეიწყალა, თუმცა გასული წლის ივნისში პოლონეთის უზენაესმა სასამართლომ მათი შეწყალების გადაწყვეტილება გააუქმა. ამის შემდეგ პოლიტიკოსები სასამართლოს წინაშე წარდგნენ. დეკემბრის მიწურულს ვარშავის რაიონულმა სასამართლომ მათ ორი წლით თავისუფლების აღკვეთა მიუსაჯა.
ქვეყნის პრემიერ-მინისტრმა, დონალდ ტუსკმა პრეზიდენტი ანჯეი დუდა პოლიტიკოსების დაპატიმრების ხელის შეშლაში დაადანაშაულა.
პოლიტიკოსების დაკავება პრეზიდენტის სასახლის წინ ასობით ადამიანმა გააპროტესტა.
აქციის მონაწილეები ამბობდნენ რომ არ ელოდნენ კამინსკის და ვინსიკის პრეზიდენტის სასახლეში დაკავებას. "ძალიან შეწუხებული ვარ იმით, რაც ახლა პოლონეთში ხდება. პოლიციას შეუძლია უკანონოდ დააკავოს პატიოსანი მოქალაქეები, პატიოსანი პოლიტიკოსები", - განაცხადა ერთ-ერთმა მომიტინგემ.
