გამოცემა Financial Times-ის ცნობით, ევროკავშირი, ევროპული საბჭოს პრეზიდენტის პოსტზე მთავარ კანდიდატად იტალიის ყოფილ პრემიერ-მინისტრს მარიო დრაგის ხედავს. კანდიდატებს შორის ასევე არიან ესპანეთის პრემიერ-მინისტრი პედრო სანჩესი და დანიის პრემიერი მეტე ფრედერიკსენი.
გამოცემის წყაროს თქმით, დრაგის აქვს ყველა შანსი იმისათვის, რომ გახდეს ევროპული საბჭოს ამჟამინდელი პრეზიდენტის, შარლ მიშელის შემცვლელი.
როგორც გამოცემა აღნიშნავს, ძნელია იმის პროგნოზირება, თუ როგორ განვითარდება მოვლენები ევროკავშირში მაღალი თანამდებობების დაკავების შესახებ შეთანხმებებთან დაკავშირებით, რადგან ეს ასევე დამოკიდებულია ევროპარლამენტის არჩევნების შედეგებზე.
გამოცემა ასევე აღნიშნავს, რომ მიშელის მემკვიდრის საჩქაროდ პოვნის აუცილებლობა ნაწილობრივ განპირობებულია იმით, რომ ევროპულ საბჭოს დროებით, შესაძლოა, უნგრეთის პრემიერ-მინისტრმა ვიქტორ ორბანმა უხელმძღვანელოს, რომლის ქვეყანაც ევროკავშირის საბჭოს თავმჯდომარე იქნება. ეს მოხდება იმ შემთხვევაში, თუ მიშელის თანამდებობის დატოვებამდე კანდიდატზე შეთანხმება ვერ მოხერხდება.
ამასთან, გამოცემა აღნიშნავს, რომ ევროკავშირის ლიდერებს ასევე აქვთ შესაძლებლობა დანიშნონ დროებითი კანდიდატი, რათა ევროპული საბჭოს პრეზიდენტის პოსტზე ვიქტორ ორბანის არჩევა თავიდან აირიდონ.
თუმცა, წყაროს თქმით, ნაკლებად სავარაუდოა, რომ დრაგი დროებით თანამდებობაზე დათანხმდეს.
ევროსაბჭოს პრეზიდენტობის სხვა კანდიდატებს შორის არიან ესპანეთის პრემიერ-მინისტრი პედრო სანჩესი და დანიის პრემიერი მეტე ფრედერიკსენი.
დრაგისგან განსხვავებით, ორივე ლიდერი დაკავშირებულია მსხვილ ევროპულ პოლიტიკურ პარტიებთან, რაც მნიშვნელოვანი ფაქტორია ევროკავშირში თანამდებობეზე დანიშვნისას.
