2027 წლიდან სამხრეთ კორეაში ძაღლის ხორცით ვაჭრობა აიკრძალება. შესაბამისი კანონი პარლამენტმა დაამტკიცა.
ახალი კანონის თანახმად, ქვეყანაში აიკრძალება ძაღლების მოშენება და დახოცვა მათი ხორცის მოხმარების მიზნით, ასევე ძაღლის ხორცის დისტრიბუცია და გაყიდვა. კანონის დარღვევის შემთხვევაში გათვალისწინებულია სამ წლამდე პატიმრობა, თუმცა თავად ძაღლის ხორცის მოხმარება არ იქნება უკანონო.
სამხრეთ კორეაში ძაღლის ხორცი ტრადიციულად მიჩნეული იყო, როგორც სიცხეში გამძლეობის საშუალებად. ბოლო წლებში მას სულ უფრო ნაკლებად მიირთმევენ, განსაკუთრებით ახალგაზრდები.
სამხრეთ კორეაში ძაღლის ხორცის აკრძალვა რამდენიმე წლის განმავლობაში განიხილებოდა. ცხოველთა უფლებების დამცველები, სხვა საკითხებთან ერთად, აკრიტიკებდნენ ძაღლების სასტიკი მეთოდებით - ელექტროშოკით ან ჩამოხრჩობით მოკვლის პრაქტიკას.
სამხრეთ კორეის სოფლის მეურნეობის სამინისტროს მონაცემებით, 2022 წლის აპრილში ძაღლებს საკვებად, დაახლოებით 1 100 ფერმა ამრავლდებდა და ძაღლის ხორცით 1600 რესტორანს ამარაგებდა. ძაღლის ხორცის მწარმოებელთა და გამყიდველთა კორეის ასოციაცია იტყობინება, რომ აკრძალვა შეეხება დაახლოებით 3 500 ძაღლის ფერმას, სადაც განთავსებულია 1,5 მილიონი ძაღლი, ასევე 3 000 რესტორანს.
ძაღლის ხორცის მოხმარების აკრძალვა 1980-იანი წლებიდან სამხრეთ კორეის არაერთმა მთავრობამ სცადა. ამჟამინდელი პრეზიდენტი იუნ სოკ იოლი და პირველი ლედი კიმ კეონ ჰეე ცნობილები არიან ცხოველებისადმი სიყვარულით. წყვილს ექვსი ძაღლი ჰყავს.
