ისრაელის ცნობით, ღაზის სექტორში ტერორისტულ დაჯგუფება „ჰამასს“ 136 მძევალი ჰყავს. სავარაუდოდ, მათგან 25 ცოცხალი აღარ არის. ამის შესახებ ისრაელის მთავრობის წარმომადგენელმა განაცხადა.
დაღუპულთა შორისაა ორი ისრაელელი სამხედრო, ასევე ისრაელის ორი მშვიდობიანი მოქალაქე, რომლებიც 2014 წლის ომის დროს გაიტაცეს და მას შემდეგ ტყვეობაში იმყოფებოდნენ.
მთავრობის წარმომადგენლის თქმით, 132 მძევალს შორის, რომლებიც 2023 წლის 7 ოქტომბერს ისრაელზე ჰამასის თავდასხმის დროს ტყვედ აიყვანეს, 121 ისრაელის და 11 უცხო ქვეყნის მოქალაქეა, მათ შორის არიან გერმანიის მოქალაქეებიც. მისივე თქმით, ტყვეებს შორის 113 კაცია, 19 კი ქალი. მძევლებს შორის ასევე არის ხუთი წლამდე ასაკის ორი ბავშვი.
„ჰამასმა“ ისრაელზე თავდასხმის შედეგად მძევლად 250 ადამიანი აიყვანა. მათი ნაწილი ისრაელსა და „ჰამასს“ შორის დროებითი ზავის დროს გათავისუფლდა.
6 იანვარს თელ-ავივში მძევლების გათავისუფლების მოთხოვნით აქცია გაიმართა. დღეს, 8 იანვარს კი აქციის მონაწილეებმა ქნესეთის შენობის შესასვლელი გადაკეტეს. ისინი მთავრობის გადადგომას და ახალი არჩევნების დანიშვნას მოითხოვდნენ.
დემონსტრანტებს შორის იყვნენ ღაზაში მყოფი მძევლების ოჯახების წევრებიც. მედიის ინფორმაციით, დაკავებულია აქციის ერთი მონაწილე.
