პროპალესტინელმა მომიტინგეებმა ბრიტანეთის პარლამენტთან გზები გადაკეტეს, ისრაელსა და ტერორისტულ დაჯგუფება „ჰამასს“ შორის ომის დაუყოვნებლივ შეწყვეტის მოთხოვნით. იუწყება Reuters.
პოლიციამ აქციის მონაწილეებს ვესტმინსტერის ხიდთან მიახლოებაში ხელი შეუშალა, რის გამოც რამდენიმე მცირე შეტაკებაც მოხდა.
მომიტინგეებმა ხიდის გარშემო მდებარე ქუჩები დაიკავეს.
დღევანდელი აქცია წინა მასობრივ მსვლელობებთან შედარებით მცირე მასშტაბის იყო, თუმცა ის გაიმართა ბრიტანეთის პარალმენტის წევრების საშობაო არდადეგებიდან დაბრუნებამდე ორი დღით ადრე. პროტესტი მიზნად ისახავდა პოლიტიკოსების იძულებას, უფრო მკაცრი პოზიცია დაეჭირათ ისრაელის წინააღმდეგ.
ბრიტანეთი ჯერ არ გამოსულა ცეცხლის დაუყოვნებლივ შეწყვეტის მოწოდებით. საგარეო საქმეთა მინისტრი დევიდ ქემერონი აცხადებს, რომ ნებისმიერი ასეთი შეთანხმება შეიძლება იყოს არამდგრადი და გამოიწვიოს ძალადობის ესკალაცია გრძელვადიანი სამშვიდობო მოგვარების გეგმის გარეშე.
