Patriot-ის სარაკეტო სისტემები წარმატებით იგერიებენ რუსულ ბალისტიკურ რაკეტებს, რომლებსაც შესაძლოა, უდიდესი დანაკარგი და ნგრევა გამოეწვიათ. ამის შესახებ გამოცემა New York Times წერს.
გამოცემა ესაუბრა უკრაინელ სამხედროს, რომელიც Patriot-ის დანადგარებზე მუშაობს.
მისი თქმით, 11 დეკემბერს, დილის 4 საათზე რადარმა დააფიქსირა, როგორც შემდეგ გაირკვა რუსული ბალისტიკური რაკეტა, რომელიც კიევის მიმართულებით მიფრინავდა.
იმ დროს, როდესაც მილიონობით ადამიანს სახლში ეძინა და განგაშის სიგნალის ჩართვის დრო აღარ იყო, უკრაინელმა სამხედროებმა Patriot-ის რამდენიმე რაკეტა გაუშვეს. გამოცემა აღნიშნავს, რომ ეს ძალიან წარმატებული აღმოჩნდა უკრაინის საჰაერო თავდაცვისთვის.
“იმის გათვალისწინებით, რომ ბალისტიკური რაკეტები იწვევს ყველაზე მეტ მსხვერპლს, ვფიქრობ, ომის დროს გადარჩენილი ადამიანების რაოდენობა ათასობითაა”, - განუცხადა გამოცემას უკრაინელმა სამხედრომ.
როგორც გამოცემას წყარომ უთხრა, როდესაც 4 მაისს პირველი ბალისტიკური რაკეტა ჩამოაგდეს, ყველა გაკვირვებული დარჩა, თუმცა ამის შემდეგ აღჭურვილობის მიმართ ნდობა გაიზარდა.
მაისსა და ივნისში, ყველაზე მასშტაბური თავდასხმებისას, როდესაც რუსეთმა გამოიყენა დრონები, ფრთოსანი, ბალისტიკური და ჰიპერბგერითი რაკეტები, Patriot -ის ორმა უკრაინულმა ბატარეამ ჩამოაგდო 34-ვე ბალისტიკური რაკეტა, რომელიც რუსეთმა კიევის მიმართულებით გაუშვა.
