უკრაინა ხარკოვთან რუსეთის განახლებული შეტევისთვის ემზადება, ვინაიდან რუსეთი აძლიერებს რეგიონის დაბომბვას. ამის შესახებ The Telegraph უკრაინის შეიარაღებულ ძალებზე დაყრდნობით წერს.

გამოცემა იხსენებს, რომ ერთი დღით ადრე ოკუპანტები რაკეტების, არტილერიისა და ნაღმტყორცნების გამოყენებით თავს დაესხნენ ქალაქს და მიმდებარე 15 დასახლებას. მათი სამიზნეები იყო, როგორც სამოქალაქო შენობები, ასევე სამხედრო პოზიციები, რაც განიხილება, როგორც მზადება ფართომასშტაბიანი შეტევისთვის უახლოეს კვირებში.

„ადგილობრივი სამხედრო დაზვერვის ქვედანაყოფებში მიიჩნევენ, რომ რუსული ძალები, შესაძლოა, გეგმავენ საჰაერო თავდასხმებს ამ შაბათ-კვირას, რათა დაამთხვიონ რუსეთში შობის დღესასწაულს, რომელიც აღინიშნება 7 იანვარს. ... ამის შემდეგ სახმელეთო შეტევა შეიძლება დაიწყოს მალევე, შესაძლოა 15 იანვარს“, - აღნიშნავს გამოცემა.

როგორც ცნობილია, რუსული და უკრაინული ჯარები იბრძვიან უკეთესი პოზიციების დაკავებისთვის ფრონტის ხაზის გასწვრივ, რომელიც მოიცავს ხარკოვის რეგიონის საზღვართან კუპიანსკს, სვატოვოს და კრემენაიას. მოსკოვმა თავისი რესურსები გადაისროლა ამ რაიონში და ცდილობს წინსვლას უკრაინის მიერ კონტროლირებადი კრემენაიასა და ლიმანის მიმართულებით.

ამავდროულად, მოსკოვის სამიზნეს სულ უფრო მეტად წარმოადგენს ხარკოვის ცენტრი, ქალაქი, რომელიც ვერ დაიკავა 2022 წლის თებერვალში შეჭრის დასაწყისში. უკრაინის სიდიდით მეორე ქალაქი თითქმის ყოველდღიური სარაკეტო თავდასხმების ქვეშაა, სამიზნეები, მათ შორის არის საცხოვრებელი კორპუსები და ხუთვარსკვლავიანი სასტუმრო, სადაც ხშირად იმყოფებიან  ჟურნალისტები და ჰუმანიტარული ორგანიზაციების წარმომადგენლები“, - წერს გამოცემა.