ევროკავშირის საბჭომ მიაღწია შეთანხმებას ბულგარეთსა და რუმინეთთან საჰაერო და საზღვაო შიდა საზღვრების გაუქმების შესახებ.
გადაწყვეტილება ერთხმად მიიღეს. ძალაში შესვლის თარიღად 2024 წლის 31 მარტი დადგინდა - ამ დროიდან მოქალაქეებს აღარ მოუწევთ კონტროლის გავლა ბულგარეთსა და რუმინეთსა და შენგენის ზონის სხვა წევრ ქვეყნებს შორის საჰაერო და საზღვაო საზღვრების გადაკვეთისთვის.
გადაწყვეტილების მიღებას მიესალმნენ ევროკომისიის პრეზიდენტი ურსულა ფონ დერ ლაიენი და რუმინეთისა და ბულგარეთის ლიდერები.
„ეს არის სიამაყის დღე რუმინეთისა და ბულგარეთისთვის. ორივე ქვეყანამ ბევრი იშრომა ამისთვის, ორივე იმსახურებს ამას“, - თქვა ევროკომისიის პრეზიდენტმა.
მოსალოდნელია, რომ შემდეგი ნაბიჯი ამ ორი ქვეყნისთვის შენგენის ქვეყნებთან სახმელეთო საზღვრებზე კონტროლის გაუქმება იქნება.
ევროკავშირში გაწევრიანების შემდეგ, ბულგარეთმა და რუმინეთმა დაიწყეს შენგენის ქვეყნებში მოქმედი კანონმდებლობის მიღება, თუმცა ზოგიერთი ქვეყნის წინააღმდეგობის გამო, კრიტერიუმების შესრულების აღიარება 12 წლით გადაიდო.
ბულგარეთისა და რუმინეთის შენგენის ზონაში გაწევრიანების წინააღმდეგ ავსტრია და ნიდერლანდები გამოდიოდნენ, რადგან თვლიდნენ, რომ სოფია და ბუქარესტი საკმარისს არ აკეთებდნენ არალეგალური მიგრაციის აღსაკვეთად. ორივე ქვეყნის "ნაწილობრივ" შესვლასთან დაკავშირებით კონსენსუსი რამდენიმე დღის წინ გაჩნდა.
