ირანში ჩამოახრჩვეს 29 წლის სამირა საბზიანი (ცნობილი, როგორც "ბავშვი პატარძალი"), რომელსაც ქმრის მკვლელობისთვის სასიკვდილო განაჩენი ჰქონდა გამოტანილი. როგორც BBC იუწყება, მან ციხეში ათი წელი გაატარა. სამირა მეთვრამეტე ქალია, რომელიც ირანის ხელისუფლებამ 2023 წელს სიკვდილით დასაჯა.
სასიკვდილო განაჩენი ქვეყნის ერთ-ერთ უდიდეს ციხეში, თეირანის გარეუბან ქარაჯში აღსრულდა. ამის შესახებ ნორვეგიაში მოქმედი ირანული უფლებადამცველი ორგანიზაცია აცხადებს.
ირანული მედია ამის შესახებ ინფორმაციას არ ავრცელებს, ინფორმაცაის ოფიციალურად ასევე არ ადასტურებს ირანის ხელისუფლება.
სამირა 15 წლი ასაკში გათხოვდა. მისი ნათესავების თქმით, ის ოჯახური ძალადობის მსხვერპლი იყო.
სამირა 19 წლის იყო, როდესაც დააპატიმრეს ქმრის მკვლელობის ბრალდებით. სასამართლომ მას მაშინვე გამოუტანა სასიკვდილო განაჩენი, თუმცა მისი აღსრულება ბიუროკრატიული მიზეზებით გადაიდო.
დაპატიმრების დროს მას ჰყავდა ორი შვილი, მათ შორის ერთ-ერთი ჩვილი. ამ ათი წლის განმავლობაში შვილებს ის მხოლოდ ერთხელ შეხვდა, სიკვდილით დასჯამდე ცოტა ხნით ადრე, დეკემბრის დასაწყისში.
როგორც BBC წერს, სიკვდილიმისჯილი ირანელი ქლების 66% ქმრის მკვლელობაშია ბრალდებული. ირანული კანონებით, ქალს არ შეუძლია ქმარს გაშორდეს, მაშინაც კი თუ ის ოჯახური ძალადობის მსხვერპლია.
ირანის სამართლებრივ სისტემაში ქალებთან მიმართებით არ არსებობს ისეთი ნიუანსი, როგორიც არის არაგანზრახ მკვლელობა ან მკვლელობა აფექტის მდგომარეობაში, ასევე არ არის გათვალისწინებული დანაშაულის გამომწვევი გარემოებები.
სიკვდილმისჯილი ქალები ხშირად კარგავენ მშობლების მხარდაჭერასაც კი, რომლებიც ამჯობინებენ დაიცვან ის, რაც მათ „ოჯახის ღირსებად“ მიაჩნიათ.
საერთაშორისო ორგანიზაციების ცნობით, ირანი და ჩინეთი აღასრულებენ უფრო მეტ სასიკვდილო განაჩენს მსოფლიოს ნებისმიერ სხვა ქვეყანასთან შედარებით, სადაც სიკვიდით დასჯა არსებობს.
