აშშ-ის პრეზიდენტის ჯო ბაიდენის მრჩეველი ეროვნული უსაფრთხოების საკითხებში ჯეიკ სალივანი დასავლეთ სანაპიროზე, ქალაქ რამალაში პალესტინის ადმინიტრაციის ლიდერს, მაჰმუდ აბასს შეხვდა.
აბასის ადმინისტრაციის განცხადებით, შეხვედრის დროს მან სალივანს განუცხადა, რომ „ღაზა პალესტინის სახელმწიფოს განუყოფელ ნაწილს წარმოადგენს“ ხოლო „მისი ნებისმიერი ნაწილის იზოლირების მცდელობა მიუღებელია“.
პალესტინური სააგენტოს WAFA-ს ცნობით, პალესტინის ლიდერმა სალივანს ასევე უთხრა, რომ ისრაელის შეტევები ღაზის სექტორზე უნდა შეწყდეს და ვაშინგტონს მოუწოდა აიძულოს ისრაელი შეწყვიტოს თავდასხმები პალესტინელებზე დასავლეთ სანაპიროზე და იერუსალიმში.
ჯეიკ სალივანის კომენტარი აღნიშნულ შეხვედრასთან დაკავშირებით ჯერ არ გავრცელებულა. რეგიონში ვიზიტისას ის უკვე შეხვდა ისრაელის პრემიერ-მინისტრ ბენიამინ ნეთანიაჰუსა და სამხედრო კაბინეტის წევრებს.
როგორც მედია წერს, ბაიდენის მრჩეველმა ისრაელის ხელისუფლებას მოუწოდა ღაზის სექტორში შეამციროს ისრაელის სამხედრო ოპერაციების ინტენსივობა, რათა მინიმუმადე შემცირდეს მშვიდობიანი მოსახლეობის მსხვერპლი.
