ისრაელის პრემიერ-მინისტრის ბენიამინ ნეთანიაჰუს უფროსმა მრჩეველმა მარკ რეგევმა, BBC-ს განუცხადა, რომ ისრაელი ყველა ღონეს მიმართავს ღაზაში მშვიდობიან მოსახლეობას შორის მსხვერპლის თავიდან ასაცილებლად.
რეგევმა კიდევ ერთხელ ხაზგასმით აღნიშნა ისრაელის პოზიცია, რომ არმია არ აწარმოებს ომს მშვიდობიანი მოსახლეობის წინააღმდეგ. მისივე თქმით, მშვიდობიანი მოქალაქეების დაცვას ართულებს ის ფაქტი, რომ „ჰამასი“ ტერორის სამხედრო მანქანას ნერგავს სამოქალაქო ტერიტორიებზე.
მისი თქმით, ისრაელის თავდაცვის ძალები ცდილობს იმოქმედოს "რაც შეიძლება ქირურგიულად ძალიან რთულ საბრძოლო ვითარებაში" და წინასწარ აფრთხილებს მოსახლეობას მოახლოებული თავდასხმების შესახებ.
სხვა საკითხებთან ერთად, რეგევმა, დაადანაშაულა „ჰამასი“ შვიდდღიანი ზავის დასრულებაში, რომლის ფარგლებშიც ისრაელს მძევლები გადასცეს პალესტინელი ტყვეების სანაცვლოდ.
რეგევი აღნიშნავს, რომ „ჰამასის“ მებრძოლებმა არ შეასრულეს ვალდებულება, გაეთავისუფლებინათ მეტი მძევალი იმ სიიდან, რომელზეც ისინი შეთანხმდნენ.
”ასე რომ, თუ ღაზის მოსახლეობას აქვს პრეტენზიები, მათ იციან, ვისკენ უნდა მიუთითონ“, - თქვა მან.
მანამდე „ჰამასი ლიდერის მოადგილემ სალეჰ ალ-არურმა კატარის ტელევიზიისთვის მიცემულ ინტერვიუში განაცხადა, რომ დანარჩენი მძევლების გათავისუფლება შესაძლებელია მხოლოდ ისრაელის მხრიდან მუდმივი ცეცხლის შეწყვეტის შემთხვევაში.
