საფრანგეთის პრეზიდენტმა ემანუელ მაკრონმა განაცხადა, რომ ღაზის სექტორში ჰუმანიტარული პაუზა რაც შეიძლება მალე უნდა გამოცხადდეს. ამის შესახებ მაკრონმა ისაუბრა პარიზში მიმდინარე საერთაშორისო ჰუმანიტარულ კონფერენციაზე, რომლის მონაწილეები ისრაელისა და „ჰამასის“ ომის შესახებ მსჯელობენ.
„დღეს ვითარება რთულია და ყოველდღე უარესდება. მოკლევადიან პერსპექტივაში ჩვენ უნდა ვიმუშაოთ სამოქალაქო მოსახლოების დაცვაზე და გვჭირდება ჰუმანიტარული პაუზა, რაც შეიძლება მალე. ასევე უნდა მივაღწიოთ ცეცხლის შეწყვეტას, ეს უნდა გახდეს შესაძლებელი. ჩვენ ვიზიარებთ ღირებულებებს და გვაქვს საერთო ვალდებულბები, რომლებმაც დღეს აქ შეგვკრიბა. როგორც ისრაელისა და პალესტინის ხელისუფლებებს, ჩვენც გვაღელვებს ჰუმანიტარული სიტუაცია ღაზაში. მოქალაქეები უნდა იყვნენ დაცულები, ეს აუცილებლობას წარმოადგენს და განხილვას არ ექვემდებარება. გრძელვადიან პერსპექტივაში ეს არის წინაპირობა, რომ ჩვენი ბრძოლა ტერორიზმთან იყოს ეფექტიანი“, – განაცხადა ემანუელ მაკრონმა.
მანამდე ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ისრაელელი მძევლების გათავისუფლების გარეშე ცეცხლის შეწყვეტა არ იქნება.
პარიზში გამართულ კონფერენციას 80-მდე ქვეყნის წარმომადგენელი, ასევე საერთაშორისო ორგანიზაციების ხელმძღვანელები ესწრებიან. კონფერენციას ასევე შეუერთდებიან ეგვიპტის, იორდანიის და სპარსეთის ყურის ქვეყნების, ასევე ევროკავშირისა და G20-ის ქვეყნების (რუსეთის გამოკლებით) წარმომადგენლები. პარიზში ასევე მიწვეულნი არიან ღაზაში მომუშავე არასამთავრობო ორგანიზაციები, მათ შორის„ექიმები საზღვრებს გარეშე“.
კონფერენციას ისრაელის წარმომადგენლები არ დაესწრებიან.
