ისრაელის თავდაცვის ძალების განცხადებით, "ჰამასი" სამხედრო მიზნებისთვის საავადმყოფოებს სისტემატურად იყენებს.
ისრაელი გაეროს და ჯანმო-ს მიერ მუდმივი კრიტიკის ქარცეცხლში ექცევა ღაზის სექტორში უშუალოდ სამედიცინო ინფრასტრუქტურაზე ან სამედიცინო დაწესებულებებთან ახლოს მდებარე ტერიტორიებზე სავარაუდო თავდასხმების გამო.
ამის საპასუხოდ, ისრაელის თავდაცვის სპიკერმა დანიელ ჰაგარიმ დღეს გამართულ ბრიფინგზე განაცხადა, რომ ისრაელმა იერიშები განახორციელა „დაზვერვის მონაცემების საფუძველზე და მოქმედებდა საერთაშორისო სამართლის ფარგლებში“. მან ხაზგასმით აღნიშნა, რომ ქვეყნის სამხედრო და პოლიტიკურ ხელმძღვანელობას არ სურს დარტყმების განხორციელება საავადმყოფოებსა და სასწრაფო დახმარების მანქანებზე.
ჰაგარიმ ასევე წარმოადგინა გასაიდუმლოებული ინფორმაცია, რომელშიც აღწერილია "ჰამასის დასაყრდენი პუნქტები", რომლებიც მდებარეობს ღაზის სექტორში სამი საავადმყოფოს ქვეშ, შიგნით და მის მიმდებარედ.
ჰაგარის განცხადებით, ალ-შიფას ჰოსპიტალი, რომელიც ყველაზე დიდია ღაზაში, მდებარეობს ჰამასის სამეთაურო ცენტრის ზევით.
მან ჟურნალისტებს წარუდგინა ვიდეო, რომელშიც, მისი თქმით, ჩანს გვირაბის შესასვლელი, რომელიც მდებარეობს კატარის მიერ დაფინანსებულ შეიხ ჰამადის საავადმყოფოში. მისი თქმით, სხვა კადრებში ჩანს, რომ ჰამასის მებრძოლები ისრაელელ ჯარისკაცებს პირდაპირ საავადმყოფოდან ესვრიან.
გარდა ამისა, ჰაგარიმ თქვა, რომ ღაზის სექტორის ჩრდილოეთში ინდონეზიური საავადმყოფო გამოიყენებოდა, როგორც მებრძოლების ოპერატიული შტაბი.
მან ჟურნალისტებს აჩვენა 2010 და 2023 წლების სატელიტური ფოტოები, საავადმყოფოს აშენებამდე და აშენების შემდეგ და განაცხადა, რომ საავადმყოფო აშენდა გვირაბების ქსელის თავზე.
ჰაგარიმ ჟურნალსიტებს ასევე აჩვენა ფოტოები, რომლებშიც ჩანს ინდონეზიური საავადმყოფოს მოპირდაპირე ტერიტორია, საიდანაც ისრაელის წინააღმდეგ რაკეტებს უშვებდნენ.
