პენტაგონის განცხადების თანახმად, შეერთებული შტატები აგზავნის ხმელთაშუა ზღვის აღმოსავლეთით მეორე ავიამზიდის დამრტყმელ ჯგუფს, რათა რეგიონში შეაჩეროს მტრული ქმედებები ისრაელის წინააღმდეგ. იუწყება CNN.
როგორც CNN აღნიშნავს, აშშ-ს ხომალდები არ არის გამიზნული ღაზაში ან ისრაელის სხვა ოპერაციებში მონაწილეობის მისაღებად, მაგრამ აშშ-ს საზღვაო ძალების ორი უძლიერესი გემის არსებობა მკაფიო გზავნილი უნდა გახდეს ირანისა და ირანის ძალებისთვის, მათ შორის ლიბანში "ჰეზბოლასთვის“.
პირველი ავიამზიდის დამრტყმელი ჯგუფი, რომელსაც ხელმძღვანელობდა ავიამზიდი „ჯერალდ ფორდი“, ამ კვირის დასაწყისში უკვე მივიდა ისრაელის სანაპიროსთან. ახლა აღმოსავლეთ ხმელთაშუა ზღვისკენ მიემართება დამრტყმელი ჯგუფი ავიამზიდ „დუაიტ ეიზენჰაუერთან“ ერთად. როგორც ტელეკომპანიას განუცხადეს, გემი ისრაელის მახლობლად მდებარე წყლებში გაჩერდება. ერთ-ერთი წყარო აღნიშნავს, რომ ჯერ გაურკვეველია რამდენ ხანს დარჩება „ჯერალდ ფორდი“ იქ „დუაიტ ეიზენჰაუერის“ ჩასვლის შემდეგ.
CNN აღნიშნავს, რომ ჯო ბაიდენის ადმინისტრაციამ მკაფიოდ განაცხადა, რომ ავიამზიდი და მისი თანმხლები ძალები არ აპირებენ მონაწილეობა მიიღონ საბრძოლო ოპერაციებში ისრაელის მხარეს. სავარაუდოდ, მათი მიზანია შეაჩერონ კონფლიქტში სხვა ძალების, მათ შორის „ჰეზბოლას“ ჩართვა.
აშშ-ს საზღვაო ძალების ცნობით, "დუაიტ ეიზენჰაუერი“ არის ავიამზიდი დამრტყმელი ჯგუფის ფლაგმანი, რომელსაც შეუერთდება სარაკეტო კრეისერი და ორი გამანადგურებელი.
