აზერბაიჯანი უკვე რამდენიმე დღეა აგროვებს ჯარებს მთიან ყარაბაღთან და სომხეთ-აზერბაიჯანის საზღვრის გასწვრივ, - ამის შესახებ განაცხადა სომხეთის პრემიერ-მინისტრმა ნიკოლ ფაშინიანმა დღეს მთავრობის სხდომაზე და ხაზგასმით აღნიშნა, რომ გასული კვირის განმავლობაში სამხედრო-პოლიტიკური ვითარება რეგიონში მნიშვნელოვნად გაუარესდა.
მან მედიას შეახსენა, რომ პირველ სექტემბერს სომხეთისა და აზერბაიჯანის საზღვარზე სროლის შედეგად სამი სომეხი სამხედრო მოსამსახურე დაიღუპა. ასევე, ფაშინიანის თქმით, გრძელდება ლაჩინის დერეფნის ბლოკირებაც.
სომხეთის პრემიერ-მინისტრის განცხადებით, ამ ქმედებებით აზერბაიჯანი აჩვენებს, რომ განზრახული აქვს ახალი სამხედრო პროვოკაციის მოწყობა ყარაბაღისა და სომხეთის წინააღმდეგ.
მან მოუწოდა გაერო-ს, მიიღოს სერიოზული ზომები, რათა რეგიონში ახალი აფეთქების პრევენცია მოხდეს. ამასთან, ფაშინიანმა ხაზი გაუსვა რომ ერევანი „მშვიდობიანი დღის წესრიგის ერთგულია“.
