ნატოს გენერალურმა მდივანმა იენს სტოლტენბერგმა რუსეთისა და ჩრდილოატლანტიკური ალიანსის 30 წევრი ქვეყნის წარმომადგენლებს ახალი შეხვედრების გამართვისკენ მოუწოდა. ამის შესახებ სტოლტენბერგმა ბერლინში, გერმანიის კანცლერ ოლაფ შოლცთან ერთობლივ პრესკონფერენციაზე განაცხადა.
სტოლტენბერგის განცხადებით, მოკავშირეები მზად არიან წარადგინონ წერილობითი წინადადებები ნატო-რუსეთის საბჭოს ფარგლებში და იმუშაონ კონსტრუქციული შედეგების მისაღწევად.
"ჩვენ შეგვიძლია ვიმსჯელოთ სამხედო აქტივობების რისკების შემცირებაზე, თავდაცვის სფეროში მეტი გამჭვირვალობის მიღწევასა და საკომუნიკაციო არხების გამუჯობესებაზე", - განაცხადა სტოლტენბერგმა.
ნატო-ს გენერალურმა მდივანმა ასევე განაცხადა, რომ ნატო-რუსეთის საბჭოს ყველა წევრი უკვე მიიწვია ამგვარი შეხვედრების სერიაში მონაწილეობისთვის.
სტოლტენბერგმა მოუწოდა რუსეთს, დაიწყოს დიალოგი ბირთვული იარაღისა და სარაკეტო სისტემების საფრთხეების შესამცირებლად.
ამასთან, მან ხაზგასმით აღნიშნა, რომ ნატო არ არის მზად, კომპრომისზე წავიდეს შემდგომ გაფართოებასა და აღმოსავლეთ ევროპაში თავდაცვის ინფრასტრუქტურის განლაგების თაობაზე.
Deutsche Welle-ს ინფორმაციით, თავის მხრივ, გერმანიის კანცლერმა ოლაფ შოლცმა რუსეთის უკრაინაში შეჭრის შემთხვევაში, "ჩრდილოეთის ნაკადის 2"-ის წინააღმდეგ სანქციების დაწესება არ გამორიცხა.
"შეერთებული შტატები და გერმანია შეთანხმდნენ ამ კუთხით სამოქმედო გეგმაზე", - განაცხადა ოლაფ შოლცმა.
მისივე განცხადებით, "ჩრდილოეთის ნაკადი 2"-თან დაკავშირებით, ბერლინსა და ვაშინგტონს შორის გასულ წელს მიღწეული შეთანხმება მოიცავს პირობას, რომლის თანახმადაც უკრაინა უნდა დარჩეს რუსული გაზის ევროპაში მიწოდებისთვის ტრანზიტულ ქვეყნად.
შეგახსენებთ, 12 იანვარს, ბრიუსელში, 2019 წლის შემდეგ პირველად, ნატო-რუსეთის საბჭოს სხდომა გაიმართა. ოთხსაათიან შეხვედრაზე მხარეებმა ხელშესახებ პროგრესი ვერ მიაღწიეს.
შეერთებულმა შტატებმა და ნატოს მოკავშირეებმა განაცხადეს, რომ ალიანსის კარი კვლავ ღია იქნება ახალი წევრებისთვის და რუსეთს ამ საკითხზე ვეტოს უფლება არ აქვს.
მოსკოვმა ამ და გასულ კვირას ჟენევასა და ვენაში გამართულ შეხვედრებს "წარუმატებელი" უწოდა, რითაც გაზარდა უკრაინაში კონფლიქტის ესკალაციის რისკი.
