ამჯერად სამსჯავროზე გადის ერეკლე II-ს მიერ განხორციელებული პოლიტიკა, რამდენად შეესაბამებოდა ქართველთა ეროვნულ ინტერესებს! ბრალდების მხარე, გუნდი „ბლიცკრიგი“, რომელშიაც გაერთიანებულია ტექუნის გარდა, თსუ-ს, ილიაუნის და საბაუნის საუკეთესო სტუდენტები, იქადნება, რომ მყარი არგუმენტირებული ბრალდებით ელვისებურად დაარწმუნებს „ნაფიც მსაჯულებს“ (ჟიურის), მთელ ქართულ საზოგადოებასაც ერეკლე II-ის პოლიტიკის სიმცდარეში. თავის მხრივ, „პატარა კახის“ პოლიტიკის დაცვის მხარე, გუნდი ,,ავი მუსაიფი" (სტუ-სა და სეუ-ს სტუდენტები) ახალ-ახალი არგუმენტების ძიებაშია და დარწმუნებულია, რომ შეძლებს გააბათილოს „ბლიცკრიგის“ ბრალდება.
(პროცესი გაიმართება 2019 წლის 6 მარტს, 13 საათზე. საქართველოს ტექნიკური უნივერსიტეტი, ადმინისტრაც. კორპუსი, გ. ნიკოლაძის დარბაზი.
საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტზე მიმდინარე მულტიდისციპლინური სამეცნიერო-სასწავლო, თეორიულ-პრაქტიკულ ღონისძიებათა პროექტის „პოლიტიკა სამსჯავროზე“ შესახებ მოგვითხრობს, პროექტის ავტორი, სტუს-ს სამართლისა და საერთაშორისო ურთიერთობების ფაკულტეტის პროფესორი, პოლიტიკის მეცნიერებათა დოქტორი ჰენრი კუპრაშვილი:
სახელმწიფოს ესაჭიროება თანამედროვე ცივილიზაციის შესატყვისი, სახელმწიფოებრივად მოაზროვნე, მრავალმხრივად განვითარებული, კონკურენტუნარიანი, მაღალი დონისა და კვალიფიკაციის სპეციალისტები, რომლებიც არა პარტიულ ან პირად, არამედ ქვეყნის ეროვნულ ინტერესებზე იქნებიან ორიენტირებულნი და საკუთარ წვლილს შეიტანენ ქვეყნის წინსვლა-განვითარებაში და არა მის ძარცვაში. ამ პრობლემის მოგვარებაა ქვეყნისათვის უპირველესი საზრუნავი და გარკვეულად ჩვენი ზოგადი, ფართომასშტაბიანი ზემიზანიც.
ამ პრობლემიდან გამომდინარეობს პროექტის მიზანი: ხელი შეუწყოს უმაღლეს სასწავლებელში სასწავლო და სამეცნიერო კვლევის პროცესის სრულყოფასა და მრავალმხრივად განვითარებული, კონკურენტუნარიანი, მაღალი დონის სპეციალისტის მომზადებას, რისთვისაც მოიძებნა სტუდენტების დაინტერესებისა და მათი სასწავლო და სამეცნიერო პროცესში აქტიურად და ხალისით ჩაბმის სრულიად ახლებური და ეფექტური ფორმა.
ფაკულტეტის დეკანის, პროფესორ ირაკლი გაბისონიას სრული მხარდაჭერითა და უშუალოდ მისი თავკაცობით პროექტის მიზნის მისაღწევად ხორციელდება ამოცანები:
- რეალური ხდება სასწავლო-სამეცნიერო თეორიულ-პრაქტიკული პროცესში სამართლის, პოლიტიკის, საერთაშორისო ურთიერთობების და სხვა სპეციალობების ჰარმონიული ურთიერთკვეთა და უერთიერთშევსება, სინთეზი და უნივერსალიზაცია.
- ინერგება გარკვეული პრობლემების გადასაწყვეტად სწავლების სხვადასხვა საფეხურის, სხვადასხვა სპეციალობების და სხვადასხვა უმაღლესი სასწავლებლების სტუდენტების გუნდურად ერთობლივი მუშაობის პრაქტიკა.
- ეწყობა ცნობილი პოლიტიკური ფიგურებისა და პოლიტიკური პარტიების მიერ წარმოებული პოლიტიკის იმიტირებული სასამართლო პროცესები. სტუდენტებისა და ექსპერტ პროფესორ-მენტორების მიერ წინასწარი პოლიტოლოგიური და სამართლებრივი შესწავლისა და ანალიზის შემდეგ, იქმნება ბრალდებისა და დაცვის გუნდები, რომელთაც აქვთ თავთავიანთი დევიზი და ლოგო, თითოეულს ენიშნება შესაბამისი მეცნიერების დარგში მენტორი. იმიტირებული სასამართლო პროცესის შემდეგ ნაფიც მასჯულთა კოლეგიას (რომლის შემადგენლობაშია პროფესორები, საპარლამენტო ლეგიტიმაციისა და სხვა კვალიფიციური პარტიების წარმომადგენლები) გამოაქვს ვერდიქტი, რამდენად შეესაბამებოდა გატარებული პოლიტიკა ქვეყნის სახელმწიფო და ეროვნულ ინტერესებს.
- სტუდენტები იღრმავებენ პროფესიულ ცოდნას, ივითარებენ კრეატიულ, სახელმწიფოებრივ და ანალიტიკურ აზროვნებას, ეუფლებიან მოლაპარაკებების ხელოვნებას, იყალიბებენ თანამშრომლობისა და გუნდური მუშაობის, საჯარო გამოსვლების, დებატების, სასამართლო პროცესებზე მონაწილეობის და კვლევითი მუშაობის უნარ-ჩვევებს.
შეიძლება თამამად ითქვას, რომ კურსის გავლის შემდეგ სახელმწიფოებრივად მოაზროვნე სტუდენტები უკეთ შეძლებენ პოლიტიკური და სამართლებრივი კუთხით სახელმწიფო პოლიტიკის სტრატეგიის კონცეპტუალურ ხედვას, ემპირიული პოლიტიკური სიტუაციის კრიტიკული ანალიზს, ამ მიმართულებით პოლიტიკის სტრუქტურულ-ფუნქციურ კანონზომიერებებში, პოლიტიკური პროცესების მართვის, პოლიტიკური კულტურის, სამეცნიერო კვლევების პრიორიტეტულ პრობლემებში და პოლიტიკურ-სამართლებრივი დოკუმენტების ძირითად დებულებებში საფუძვლიან გარკვევას, საქართველოს ეროვნული და სახელმწიფო ინტერესების დასაცავად პოლიტიკოსების საქმიანობის კვალიფიციურ შეფასებას და სხვ.
პროექტის მიხედვით, ასევე, უნდა განხორციელდეს სახელმწიფო და ეროვნული ინტერესების მყარად არგუმენტირებული კრიტერიუმებისა და პარამეტრების განსაზღვრა (მათი მნიშვნელობის ციფრული გამოხატულობა, ზღვრულობის პროცენტული გამოსახულება, წონადობის დადგენა და სხვ.) და საქართველოს სახელმწიფოსათვის სასიცოცხლოდ მნიშვნელოვანი, სტრატეგიულად მარადიული ღირებულებების ფორმირების პოლიტიკური და სამართლებრივი კანონზომიერებების დადგენა. ამის განხორციელება კი ნიშნავს პოლიტიკის მეცნიერებათა მსოფლიო კვლევის თეორიულ-პრაქტიკულ პროცესში ქართული წვლილის შეტანას. ამის რესურსები და პრეტენცია ფაკულტეტს ნამდვილად აქვს, რაშიც რექტორი, აკადემიკოსი არჩილ ფრანგიშვილიც მხარს გვიჭერს. აქედან გამომდინარე, პროექტის შემდგომ დასახვეწად და მისთვის სოლიდური ანალიტიკური ბაზის შესაქმნელად დამუშავდება პოლიტიკისა და სამართლის სტრატეგიული საკითხები პროგრამულად და შეიქმნება კომპიუტერული პროგრამა პოლიტომეტრიკული მეთოდის საფუძველზე.
პროექტი იმუშავებს უცხო ენებზეც ცნობილი უმაღლესი სასწავლებლების სტუდენტების მონაწილეობით. ასევე მალე პროექტში ჩაერთვებიან პროფესორებისა და წარჩინებული სტუდენტების მონაწილეობით საშუალო სკოლების უფროსი კლასელებიც.
პროექტის ყოველი ციკლის დასრულების შემდეგ გაიმართება დიდი საზეიმო დახურვა, სადაც მონაწილე სტუდენტებს დეკანატი პირდება დიდ სიურპრიზებს და რაც მთავარია კურსგავლილები მიიღებენ უაღესად პრესტიჟულ სერთიპიკატსა და სამკერდე ნიშანს.