საგურამოში სამღვდელოების წარმომადგენელმა მამა ტარიელ სიკინჭილაშვილმა ორ ადამიანს სცემა. ინფორმაცია "ჯი-ეიჩ-ენს" "თავისუფლების ინსტიტუტის" წევრმა თეა თუთბერიძემ მიაწოდა. მისი თქმით, მას დაუკავშირდა საგურამოს მკვიდრი ვინმე, ზაურ უნდილაშვილი, რომლის მტკიცებითაც, მის 20 წლის ვაჟსა და ძმას, თევდორე უნდილაშვილს საგურამოს ეკლესიის მოძღვარი, მამა ტარიელ სიკინჭილაშვილშვილი და მისი თანმხლები პირები ფიზიკურად გაუსწორდნენ, მიზეზი კი იყო თანხა, რომელიც მამა ტარიელ სიკინჭილაშვილის ახლობელს უნდილაშვილებისაგან ჰქონდა ნასესხები.
თუთბერიძის განცხადებით, თანხის მოთხოვნის შემდეგ, მამა ტარიელ სიკინჭილაშვილმა თევდორე უნდილაშვილი სახლიდან გარეთ გაიყვანა, რომელსაც მისი 20 წლის ძმისშვილი გაყვა, ამის შემდეგ მამა ტარიელ სიკინჭილაშვილმა და მისმა თანმხლებმა პირებმა უნდილაშვილებს ფიზიკური და სიტყვიერი შეურაცხყოფა მიაყენეს.
"ჯი-ეიჩ-ენის" ინფორმაციით აღნიშნულ ფაქტტან დაკავშირებით პოლიციამ მოკვლევა დაიწყო. უკვე დაიკითხა დაზარალებული.
შეგახსენებთ, რომ თეა თუთბერიძეს საზოგადოების ერთ ჯგუფთან ერთად, დეკანოზ ტარიელ სიკინჭილაშვილის მიმართ პრეტენზია უკვე ჰქონდა, კერძოდ მისი სახელი მოხსენიებული იყო იმ კითხვების ჩამონათვალში, რომელიც საზოგადოების ერთმა ნაწილმა საქართველოს პატრიარქს, უწმინდესსა და უნეტარესს ილია მეორეს გაუგზავნა. თუთბერიძის განმარტებით, დეკანოზი სიკინჭილაშვილი სწორედ ამ წერილის შემდეგ გადაიყვანეს საგურამოში.
"რატომ არ რეაგირებთ დეკანოზ ტარიელ სიკინჭილაშვილის განცხადებებზე, რომელიც ამბობს, რომ სომხებმა ტაძრები სომხეთში უნდა ააშენონ, შეურაცხყოფს საქართველოს ეთნიკურად სომეხ მოქალაქეებს, და ვანდალურად ხელყოფს სომხურ საფლავებს? მიგაჩნიათ თუ არა, რომ ეს ყოველივე ხელს უწყობს სიძულვილის გაღვივებას სომხური ეკლესიისა და ეთნიკურად სომეხი საქართველოს მოქალაქეების მიმართ?", - ნათქვამი იყო აღნიშნულ წერილში.
აღნიშნული ინფორმაცია "ჯი-ეიჩ-ენმა" საპატრიარქოში, პატრიარქის მდივანთან მამამ მიქაელ ბოტკოველთან გადაამოწმა.
მისი განცხადებით, აღნიშნულთან დაკავშირებით საპატრიარქოში არც ინფორმაცია არ შესულა და არც არავის არ მიუმართავს.
"თუ ფაქტი მართლაც მოხდა დაზარალებულმა შესაბამის უწყებებს უნდა მიმართოს. მე კი ჩამს მხრივ შევცდები ინფორმაციის სინამდვილე გადავამოწმო", - განაცხადა პატრიარქის მდივანმა.
