"ქრისტიან-დემოკრატები" მაგისტრალური გაზსადენის საკონტროლო პაკეტის გასხვისების თავიდან ასაცილებლად კანონში დამცავი მექანიზმის ჩადებას ითხოვენ. ამის შესახებ "ქრისტიან-დემოკრატების" წარმომადგენელმა ლევან ვეფხვაძემ დღეს რიგგარეშე სესიაზე განაცხადა.
"აქამდე გაზსადენის პრივატიზაცია დაუშვებელი იყო. ახლა ეს მუხლი ამოვარდა. პრემიერ-მინისტრი გვეუბნება, რომ 51%-ს ანუ საკონტროლო პაკეტს ჩვენ დავიტოვებთ. რატომ უნდა ვენდოთ გილაურის სიტყვას, მით უმეტეს, რომ პრეზიდენტ სააკაშვილს თანამდებობაზე ადამიანების შეცვლის განსაკუთრებული უნარი აქვს. პრემიერი შეიძლება დღეს ერთი იყოს, ხოლო ხვალ მეორე და მან მონდომოს სრულად გატანა აქციების რომელიმე ბირჟაზე. მერე რას ვაპირებთ? პრობლემა კი ის არის, რომ ამ გაზსადენის მიმართ დიდი პოლიტიკური ინტერესი ჩვენს ჩრდილოელ მეზობელს აქვს და შესაძლოა აღმოსავლეთ-დასავლეთ დერეფანს სერიოზული საფრთხე შეექმნას. ამიტომ გთავაზობთ, კანონის გარდამავალ დებულებით მთავრობას საკონტროლო პაკეტის გაყიდვა ავუკრძალოთ", - განაცხადა ვეფხვაძემ.
შეგახსენებთ, რომ მაგისტრალურ გაზსადენის პრივატიზების შესაძლებლობა მას შემდეგ გაჩნდება, რაც პარლამენტი "სახელმწიფო ქონების შესახებ" კანონში შესატან ცვლილებების დაამტკიცებს. თუმცა როგორც დღეს საბიუჯეტო და რეგიონალური განვითარების კომიტეტების გაერთიანებულ სხდომაზე მთავრობის საპარლამენტო მდივანმა გია ხუროშვილმა განაცხადა, მთავრობა აღნიშნული კანონპროექტის ექსპერტიზას აკეთებს.
"მთავრობა ამ კანონპროექტის დარგობრივ ექსპერტიზას აკეთებს და მე გთხოვთ, მეორე მოსმენა არ გაიმართოს, ვიდრე ამ ექსპერტიზის პასუხები არ გვქნება", - განაცხადა ხუროშვილმა.
