"ეროვნული საბჭოს" თბილისის მერობის კანდიდატ ზვიად ძიძიგურს ხულიგნობის ბრალის დამტკიცების შემთხვევაში 4-დან 7 წლამდე თავისუფლების აღკვეთა ემუქრება. როგორც "ჯი-ეიჩ-ენს" იურისტმა თამარ მირცხულავამ განუცხადა, აღნიშნულს საქართველოს სისხლის სამართლის კოდექსის 239-ე მუხლის მესამე ნაწილი ითვალისწინებს.
"კანონმდებლობის მიხედვით, ხულიგნობა, რომელიც საზოგადოებრივი წესრიგის დარღვევასა და საზოგადოებისადმი უპატივცემულობის გამოხატვას ნიშნავს, თავისუფლების 7 წლამდე აღკვეთით ისჯება იმ შემთხვევაში, თუ ქმედება ცეცხლსასროლი იარაღის ან იარაღად სხვა საგნის გამოყენებითაას ჩადენილი", _ განუცხადა "ჯი-ეიჩ-ენს" თამარ მირცხულავამ.
აღსანიშნავია ისიც, რომ ზვიად ძიძიგური, როგორც ყოფილი დეპუტატი არ სარგებლობს ხელშეუხებლობის იმუნიტეტით. მსგავსი პრივილეგია მას არც, როგორც თბილისის მერობის კანდიდატს გააჩნია.
შეგახსენებთ იმასაც, რომ გენერალურმა პროკურატურამ ძიძიგურის საცხოვრებელ სახლთან წუხელ მომხდარ ინციდენტზე მართალია სისხლის სამართლის საქმე ხულიგნობის მუხლით აღძრა, თუმცა არა უშუალოდ "ეროვნული საბჭოს" ლიდერის წინააღმდეგ. ინციდენტში მონაწილე რომელ მხარეს - მერობის კანდიდატს თუ "ნაციონალური მოძრაობის" აქტივისტებს დაბრალდება ხულიგნობა, ამას გამოძიება დაადგენს, თუმცა არ არის გამორიცხული, ხელისუფლებამ ერთ-ერთი ყველაზე რადიკალური და მით უფრო, ბოლო დროს რუსეთთან დაახლოებული ოპოზიციონერი ლიდერის "ჩამოშორების" ეს შანსი გამოიყენოს...
როგორც ცნობილია, "ეროვნული საბჭოს" მერობის კანდიდატის საცხოვრებელ სახლთან წუხელ ინციდენტი მოხდა. მმართველი გუნდის აქტივისტების მტკიცებით, ისინი ჩოლოყაშვილის ქუჩაზე "ნაციონალური მოძრაობის" კანდიდატების პლაკატებს აკრავდნენ, როცა "მათთან ზვიად ძიძიგური მივიდა, ჯერ სიტყვიერი, შემდეგ ფიზიკური შეურაცხყოფა მიაყენა, მოგვიანებით კი მათი მიმართულებით 4-ჯერ გაისროლა". თავად ძიძიგურის მტკიცებით კი, მას თავს 50-მდე კაცი დაესხა და ჰაერში სიტუაციის განმუხტვის მიზნით გაისროლა.
