კომუნიკაციების ეროვნულმა კომისიამ არასამთავრობო ორგანიზაცია `ახალგაზრდა ფინანსისტთა და ბიზნესმენთა ასოციაციის~ (აფბა) და ყოფილი ენერგოომბუდსმენის, დავით ებრალიძის მიერ, კომისიაში მობილური ოპერატორების წინააღმდეგ შეტანილი სარჩელის განხილვაზე უარი განაცხადა. ამის შესახებ `აფბას~ წარმომადგენლებმა დღეს პრესკონფერენციაზე განაცხადეს.
მათი ინფორმაციით, მიზეზად კომისიამ ბაზარზე არსებული სიტუაციის არცოდნა და მობილურ ოპერატორებს შორის ურთიერთჩართვის ტარიფის მოსალოდნელი შემცირება დაასახელა, რომელიც 14 თეთრს შეადგენს.
`მარეგულირებლის განცხადებით, კომისია ფიჭური კავშირგაბმულობის ბაზარს იკვლევს, რომელიც ჯერ არ დასრულებულა. შესაბამისად, მარეგულირებელი არაა ინფორმირებული ბაზარზე არსებული მდგომარეობის შესახებ~, - აღნიშნავენ არასამთავრობო ორგანიზაციაში.
ისინი მიიჩნევენ, რომ ეს მიუღებელი არგუმენტია, რადგან აღნიშნული უწყების პირდაპირი მოვალეობაა მუდმივად იყოს ბაზარზე არსებულ ვითარების საქმის კურსში და აღნიშნული სფეროს მუდმივი კონტროლი უნდა აწარმოოს.
ამასთან, როგორც აფბაში აღნიშნავენ, კომუნიკაციების კომისიამ ფიჭური კავშირგაბმულობის ბაზრის კვლევა 2008 წელს ჩაატარა. კვლევის თანახმად, მოძრავი საკომუნიკაციო მომსახურების კონკრეტული ოპერატორის ძირითადი ქსელის საკომუტაციო ტერმინალურ ელემენტებთან დაშვებისა და ურთიერთჩართვის საბითუმო ბაზრის შესაბამის სეგმენტებზე მნიშვნელოვანი საბაზრო ძალაუფლების მქონე პირები გამოვლინდნენ - საქართველოს მთელი ტერიტორია: შპს „მაგთიკომი" და შპს „ჯეოსელი".
ამის მიუხედავად, კომისიას `მაგთისა~ და `ჯეოსელის~ მიმართ რეალური შედეგის მომტანი ღონისძიებები არ გაუტარებია.
ამასთან, აფბას ინფორმაციით, მობილური საკომუნიკაციო მომსახურების ყოველთვიური შემოსავლების ოდენობა, საშუალოდ ერთ აბონენტზე გადაანგარიშებით, 2007 წელს 22.59 ლარს, ხოლო 2008 წელს 25.13 ლარს შეადგენდა. მიუხდავად იმისა, რომ კომისიამ დაინახა 2007 წელთან შედარებით, 2008 წელს მოსახლეობის ხარჯების გაზრდა მობილურით მომსახურებაზე, ამის გამოსასწორებლად ქმედითი ნაბიჯები არ გადაუდგამს.
რუსეთში აღნიშნული მაჩვენებელი 2009 წლის 1 იანვრისთვის 14,96 ლარს შეადგენდა, რაც გასულ წელთან შედარებით 31,7%-ით ნაკლებია; უკრაინაში - 7,48 ლარი, წინა წელთან შედარებით 39%-ით იაფი; ყაზახეთში -13,94 ლარი, წინა წელთან შედარებით 32,9%-ით იაფი.
რაც შეეხება, ურთიერთჩართვის ტარიფის მოსალოდნელ შემცირებას, რომელმაც, თავის მხრივ, ბაზარზე საცალო ფასის შემცირება უნდა გამოიწვიოს, აფბას აზრით, ეს არგუმენტიც საფუძველს მოკლებულია, რადგან საქართველოში ამ მაჩვენებლის შემცირება უკვე ორჯერ მოხდა 2003 წელს 22,8-დან 18,8 თეთრამდე და 2007 წელს 18,8 თეთრიდან 14,8 თეთრამდე, რასაც საცალო ბაზარზე მობილურით საუბრის გაიაფებაზე, ფაქტობრივად, ზეგავლენა არ მოუხდენია.
