აშშ-ის სახელმწიფო დეპარტამენტის მიერ მომზადებული ანგარიშის გამო ამერიკა საქართველოს მიმართ პოზიციას არ შეიცვლის. ამის შესახებ აშშ-ის ელჩმა საქართველოში ადამიანის უფლებათა დაცვის ორგანიზაციების ხელმძღვანელებთან შეხვედრის დასრულების შემდეგ განაცხადა.
"ანგარიში ჩვენს საქართველოსთან ურთიერთობას და დამოკიდებულებას არ შეცვლის. დასკვნაში აღნიშნულია, რომ ადამიანის უფლებათა დაცვის კუთხით პრობლემები დღემდე არსებობს. თუმცა მნიშვნელოვანია, რომ ამ კუთხით მთელ რიგ სფეროებში არსებული გამოწვევების მოგვარების სურვილი ხელისუფლებას გააჩნია და ცალსახად აფიქსირებს, რომ სურს ევროატლანტიკურ სტრუქტურებში ინტეგრირება სურს", - აღნიშნა ბასმა.
ელჩის შეფასებით, საქართველოში მხოლოდ კანონის შეცვლით პრობლემები არ მოიხსნება, რადგან ხშირად კანონის უზენაესობა ყველას მიმართ თანაბარი არ არის.
"საქართველოში კანონის უზენაესობის მხრივ გარკვეული პრობლემები არსებობს. ხშირად კანონი ყველა მოქალაქისთვის უზენაესი არ არის, რის შედეგადაც დაუცველი მოსახლეობა ზარალდება. აუცილებელია, კანონის უზენაესობის აუცილებლობა როგორც მთავრობა, ასევე რიგითმა მოქალაქეებმაც გაიაზრონ", - განაცხადა ჯონ ბასმა.
მისი ინფორმაციით, სახელმწიფო დეპარტამენტის ანგარიში საქართველოს მთავრობისგან, ასევე სახალხო დამცველის, არასამთავრობო სექტორის და კონკრეტული პირებისგან მიღებული ინფორმაციით მომზადა. თუმცა მისი ნამდვილობა ამერიკულმა მხარემაც გადაამოწმა.
