რუსეთი თუ კვლავ დაესხმება თავს უკრაინას, შეერთებული შტატები აგრესორს სამხედრო გზით უპასუხებს, - ამის შესახებ განაცხადა პოლონეთის პრემიერ-მინისტრმა დონალდ ტუსკმა, რომელიც უკრაინაში მშვიდობისადმი მიძღვნილ ბერლინის სამიტს დაესწრო.
„პირველი შემთხვევაა, როდესაც ეს ამერიკელი მომლაპარაკებლებისგან მესმის და ბატონმა სტივ uიტკოფმა აქ ნათლად განაცხადა, რომ ამერიკა უკრაინის უსაფრთხოების გარანტირებაში ისე ჩაერთვება, რომ რუსებს ეჭვი არ შეეპაროთ, რომ (ცეცხლის შეწყვეტის დარღვევის შემთხვევაში) აშშ-ის პასუხი სამხედრო გზით იქნება,“ - განაცხადა ტუსკმა.
მისი თქმით, ფაქტია, რომ ნათლად გამოჩნდა, რომ „ამერიკელები, ევროპელები და უკრაინა ერთ მხარეს არიან“.
პოლონეთის პრემიერ-მინისტრმა ასევე ხაზგასმით აღნიშნა, რომ ერთადერთი რეალური შანსი იმისა, რომ რუსეთი იძულებული გახდეს, დაიწყოს სერიოზული მოლაპარაკებები ომის დასასრულებლად, ან სულ მცირე, ზავის დასამყარებლად, არის მთელი დასავლეთის გაერთიანება.
„აუცილებელია, რომ ამერიკელებთან და უკრაინელებთან ერთად, ჩვენ, ვიმოქმედოთ, როგორც მოკავშირეებმა, რათა რუსებმა და პუტინმა დაინახონ, რომ ამ სამ მხარეს შორის განხეთქილების მიღწევა შეუძლებელია“, - აღნიშნა ტუსკმა.
