6 დეკემბერს სასტუმრო „თბილისი მარიოტში" საქართველოს არბიტრთა ასოციაციის ორგანიზებით კონფერენცია გაიმართება. კონფერენციას საქართველოს იუსტიციის მინისტრის პირველი მოადგილე ალექსანდრე ბარამიძე გახსნის. კონფერენციის თემებია: არბიტრთა დანიშვნის საუკეთესო პრაქტიკა და ქართული რეალობა და არბიტრთა მიუკერძოებლობა და დამოუკიდებლობა.
როგორც ცნობილია, საქართველოს არბიტრთა ასოციაცია გეგმავს პერმანენტულად გააკეთოს კონფერენციები საქართველოში არბიტრაჟთან დაკავშირებული აქტუალური საკითხების განხილვისთვის.
კონფერენციაზე მოწვეულები არიან ასევე საქართველოს სავაჭრო პალატისა და საქართველოს ბიზნეს ასოციაციის წარმომადგენლები, სააპელაციო სასამართლოს მოსამართლეები, საქართველოს არბიტრთა ასოციაციის წევრები, ლიდერი იურიდიული კომპანიების წარმომადგენლები და ადვოკატები.
როგორც ცნობილია, საქართველოს არბიტრთა ასოციაცია (GAA) აქტიურად თანამშრომლობს იუსტიციის სამინისტროსთან, არბიტრაჟთან დაკავშირებულ კანონმდებლობაში ცვლილებათა პაკეტის მომზადებისათვის.
კონფერენციის სპონსორები არიან: USAID - „მართლმსაჯულების დამოუკიდებლობისა და სამართლებრივი გაძლიერების პროექტი" (JILEP), იურიდიული კომპანია შპს „ნოდია, ურუმაშვილი და პარტნიორები, " შპს „დავების განმხილველი ცენტრი."
შეგახსენებთ, რომ , რომ საქართველოს არბიტრთა ასოციაცია (GAA) დაფუძნდა 2013 წლის 22 აპრილს და მიზნად ისახავს არბიტრაჟის განვითარებას საქართველოში და არბიტრთა თვითრეგულირების მექანიზმის ჩამოყალიბებას. ამ მიმართულებით ასოციაციამ უკვე დაიწყო მუშაობა ეთიკის კოდექსის შექმნაზე და ასოციაცია წარმატებით თანამშრომლობს „მართლმსაჯულების დამოუკიდებლობისა და სამართლებრივი გაძლიერების პროგრამასთან" (JILEP).
