,,უფლებადამცველთა გაერთიანების'' თავმჯდომარე ნიკოლოზ მჟავანაძე წყლის ობიექტების გასხვისებასთან დაკავშირებით პრესკონფერენცია გამართა
2007 წლის 25 ივლისს სახელმწიფომ "თბილისის წყალი", "ჟინვალჰესი", "მცხეთაწყალკანალი" და "საქწყალკანალი" ერთდროულად გამოიტანა აუქციონზე. გამარჯვებული კომპანიის გამოსავლენად 3 ძირითადი კრიტერიუმი დასახელდა: შესაძენი ფასი, საწარმოს განვითარების გეგმა და ინვესტიციების მოცულობა.
მიუხედავად იმისა, რომ ტენდერში მსოფლიოს უმსხვილესი წყლის კომპანიები მონაწილეობდნენ, გამარჯვებულად ნაკლებად ცნობილი შვეიცარიული "მალტიპლექს სოლუშენსი" დასახელდა. კომპანია ვალდებულებას იღებდა, ობიექტებში 85 662 000 მილიონი დოლარი გადაეხადა, 350 მილიონი დოლარის ინვესტიციები განეხორციელებინა და წყლის ტარიფი 2013 წლამდე 2,95 ლარზე მეტად არ გაეზარდა.
გამარჯვებულ კომპანიას საპრივატიზაციო საწარმოები პირდაპირი მიყიდვის წესით უნდა გადასცემოდა. თუმცა, საკუთარ გადადგომამდე ერთი დღით ადრე, 2007 წლის 23 და 24 ნოემბერს მიხეილ სააკაშვილმა განკარგულებები გამოსცა და საპრივატიზაციო ობიექტები გამარჯვებული შვეიცარიული "მალტიპლექს სოლუშენის" ნაცვლად, ვირჯინიის კუნძულებზე რეგისტრირებულ "მალტიპლექს ენერჯი ლიმიტედს" გადასცა. ამ ცვლილებების შესახებ მთავრობას არანაირი განმარტება არ გაუკეთებია. ეს გადაწყვეტილება არ გაუპროტესტებია გამარჯვებულ შვეიცარიულ კომპანიას.
აღნიშნული გარიგებებას კორუფციული გარიგება უწოდეს ექსპერტებმა და არასამთავრობო ორგანიზაციების ნაწილმა. კოალიცია ,,ქართული ოცნების'' ერთ-ერთმა ლიდერმა თინათინ ხიდაშელმა კი განაცხადა, რომ „მულტიპლექს სოლუშენსის", „მულტიპლექს ენერჯი ლიმითედსა" და „ჯორჯიან უოთერ ენდ ფაუერის" უკან ქართული კაპიტალი იდგა და ქართველ სახელმწიფო მოხელეთა ინტერესი იმალებოდა. ,, რესპუბლიკური პარტია'' თბილისის მერს მსხვილ კორუფციულ გარიგებაში სდებდა ბრალს. გამოითქვა საფუძვლიანი ეჭვი, რომ გიგი უგულავა პირადად იყო დაინტერესებული „თბილისის წყლის", ისე გაყიდვაში, როგორც ეს განხორციელდა.
"თბილისის წყალის", "ჟინვალჰესის", "მცხეთაწყალკანალის" და "საქწყალკანალის" ოფშორში დარეგისტრირებულმა მეპატრონემ ვერ უზრუნველყო ხელშეკრულებით გათვალისწინებული პირობების შესრულება რაც დაკავშირებული გახლდათ ქსელების რეაბილიტაციასთან, გამრიცხველიანებასთან და წყლის ფასთან . გარდა ამისა კონტროლის პალატამ დადო დასკვნა სადაც იკვეთება გარკვეული საეჭვო გარიგებები სახელმწიფო უწყებებსა და თბილსის წყალს შორის, გაუგებარი მიზეზების გამო დასკვნა თაროზე შემოიდო და მას მსვლელობა არ მიეცა.
,,უფლებადამცველთა გაერთიანება'' მოუწოდებს ხელისუფლებას გადახედოს "თბილისის წყლის", "ჟინვალჰესის", "მცხეთაწყალკანალის" და "საქწყალკანალის" გასხვისების საკითხს და კონტროლის პალატის იმ დასკვნას სადაც ხელისუფლების და თბილისის წყალის საეჭვო გარიგებები იკვეთება.